Հայտնիներից ովքե՞ր են օգտվում երթուղայիններից . photo

Որքան էլ մարդիկ վառ պատկերացումներ ունենան «աստղային կյանք» կոչվածի մասին, Հայաստանում չկան աստղաբաշխական հոնորարներ (բացառությամբ մի քանի անհատների)։ Հայտնի մարդիկ մեզանից մեկն են, հիմնականում լինում են այն վայրերում, որտեղ մենք, օգտվում են նույն խանութներից, երբեմն՝ նույնիսկ երթուղայիններից։

Իհարկե, հայտնի դառնալուց հետո շատերը խուսափում են օգտվել հասարակական տրանսպորտից, լինել հասարակական վայրերում, քանի որ ասում են՝ կողմնակաի հայացքները շատ են, սակայն կան նաև մարդիկ, ում հայտնիությունը չի կաշկանդում օգտվել երթուղայիններից։ BlogNews.am-ը խոսել է հասարակական տրանսպորտից օգտվող հայտնիների հետ։ Անդրադարձել ենք նաև նրանց՝ քաղաքացիական դժգոհություններին:)

Պարոնյան թատրոնի դերասանուհի Հասմիկ Վերդյանը, ով վերջերս նկարահանվում էր «Տնփեսա» սիթքոմում, նշեց, որ շարունակում է օգտվել երթուղայիններից, ինչպես նախկինում։ «Խանութ էլ, երբ մտնում եմ, մարդիկ ինձ ճանաչում են, ինչը հաճելի է։ Ես չեմ կոմպլեքսավորվում երթուղային նստելուց, ճիշտ հակառակը, ինձ հաճելի է, որ մարդիկ ինձ ճանաչում են, հաճոյախոսում»,- նշեց նա ոու հավելեց, որ շտապելու դեպքում է տաքսի նստում։

«Բնականաբար, լավ է, եթե հնարավորություն ունես ու մեքենա ես գնում, սակայն եթե  չունես այդ հնարավորությունը, նման ձևական բաների հետևից ընկնել պետք չէ։ Ես նյութապաշտ չեմ։ Իհարկե, մեր երթուղայիննում անհարմար է՝ հատկապես, երբ տեղ չի լինում, շոգ է, երաժշտությունը լավը չէ, սակայն ունենք այն, ինչ ունենք։ Երթուղային չնստել միայն, որովհետև հայտնի ես, աննորմալություն եմ համարում»,- նկատեց Հասմիկը։

«Հարազատ թշնամի» հեռուստասերիալում Լիլիի կերպարով հայտնի դարձած Անուշկա Մարգարյանը ևս երթուղայինից օգտվողների բանակից է։ «Ես միշտ օգտվել եմ երթուղայինից, հիմա էլ շարունակում եմ օգտվել։ Շատ են ասում, եթե հայտնի ես, պետք է ավելի քիչ լինես հասարակության մեջ, բայց ես սխալ եմ համարում հասարակությունից հեռու մնալը. դու էլ ես հասարակության մի մասնիկը։ Ես փորձում եմ հնաավորինս պարզ լինել, քանի որ միշտ վատ եմ վերաբերել, երբ հայտնի մարդիկ իրենց գոռոզ են պահել»,- նշեց նա։

Խոսելով երթուղայինների անհարմարության մասին՝ Անուշկան նկատեց, որ տրանսպորտի հարցը գնալով ավելի է բարդանում. «Ստիպված ես լինում երկար սպասել, 2 տրանսպորտ փոխել, նաև՝ հիմա  շատ են երթուղայիններում գողության դեպքերը։ Իհարկե,  տաքսին ավելի հարմար է։ Եթե շտապում եմ, տաքսի եմ նստում, սակայն չնստել հասարակական տրանսպորտ, որովհետև հայտնի ես, մի քիչ ծիծաղելի է»։

Դերասանուհի Լիա Զախարյանը ևս չի կոմպլեքսավորվում երթուղայիներից օգտվելիս։ «Ես շարունակում եմ  ապրել այնտեղ, որտեղ ապրել եմ, օգտվել նույն խանութներից, հասարակական տրանսպորտից ու բացարձակ վատ բան չեմ տեսնում դրա մեջ։ Ավելին, հասարակական տրանսպորտում կարողանում ես ուսումնասիրել տարբեր մարդկանց, ինչը հետագայում կարող ես օգտագործել մասնագիտությանդ մեջ՝ տարբեր կերպարներ կերտելիս։ Ես նման կոմպլեքս չունեմ, որ չնստեմ երթուղային տաքսի։ Չեմ հասկանում էկրանից երևալու ու չերևանլու տարբերությունը։ Ինչո՞վ են իրարից տարբերվում էկրանից այն կողմ և այս կողմ գտնվող մարդիկ, ինձ համար բոլորը  հավասար են»,- նշեց նա։