ՀԷՑ-ի աուդիտը բումերանգ է Հայաստանի էներգետիկ մաֆիայի համար

Բաղրամյան պողոտայում երիտասարդության բողոքի ցույցերից հետո որոշվեց մեկ անգամ ևս աուդիտ անցկացնել ՀԷՑ-ում (Հայաստանի էլեկտրական ցանցեր), որպեսզի հանրությունը վստահի իշխանություններին, որ էլեկտրաէներգիայի սակագնի բարձրացմանն այլընտրանք չկա: Սակայն իրավիճակային զարգացումներն անկանխատեսելի են այն առումով, որ ռուսական ԻՆՏԵՌ ՌԱՕ ընկերությունը ևս անուղղակի սպառնում է Հայաստանի էներգետիկ ոլորտի պատասխանատուներին առաջիկա աուդիտի արդյունքներով: 

ԻՆՏԵՌ ՌԱՕ ընկերության խորհրդի նախագահ Բորիս Կովալչուկը հուլիսի 1-ին հայտարարել էր, որ Հայաստանում էլեկտրաէներգետիկ ոլորտում առկա իրավիճակը ունի բացառապես տնտեսական պատճառներ, և ասել էր, որ ՀԷՑ-ի վնասները Հայաստանում գործող կարգավորման համակարգի արդյունք են: 

Արդեն հուլիսի 8-ին ԻՆՏԵՌ ՌԱՕ ընկերության կառավարման խորհրդի անդամ , ընկերության զարգացման և ներդրումների համակարգի ղեկավար Իլնար Միրսիյապովը հայտարարել է, որ վերջին տարիներին Հայաստանում էլեկտրաէներգիայի սակագնի բարձրացումից շահույթ են ստացել միայն էլեկտրաէներգիա արտադրող ընկերությունները (այդ թվում նաև փոքր ՀԷԿ-երը ), այլ ոչ թե ՀԷՑ-ը: Այս մասին հաղորդում է ՏԱՍՍ գործակալությունը: Նրա խոսքով, էլեկտրաէներգիայի սակագնի բարձրացումից ՀԷՑ-ի շահույթը վերջին հինգ տարում նվազել է երկու անգամ: Թե որքան են աճել էլեկտրաէներգիա արտադրող ընկերությունների շահույթները, Միրսիյապովը չի մանրամասնել: 

ԻՆՏԵՌ ՌԱՕ ընկերության հերթական մեղադրանքի էությունն այն է, որ վերջին հիմնգ տարում էլեկտրաէներգիայի սակագինը բարձրացվել է Հայաստանում էլեկտրէներգիա արտադրող ընկերությունների համար շահույթներ ապահովելու համար, նաև ՝ ի հաշիվ ՀԷՑ-ի շահույթի: 

Սա լուրջ մեղադրանք է Հայաստանի իշխանությունների հասցեին և եթե աուդիտը հաստատի ԻՆՏԵՌ ՌԱՕ-ի մեղադրանքները, ապա հրաժարականների շքերթն անխուսափելի է: 

Armweeklynews.am