12 Հոկտեմբեր, 2015

ՀԷՑ-ի գործարքը բիզնես տեսանկյունից արդյունավետ չէր. Հ. Աբրահամյան

«Սահմանադրական բարեփոխումները շատ կարևոր են մեր երկրի համար, դա ուղղակի ապահովում է մեր երկրի անվտանգությունը և եթե դեկտեմբերի 6-ին ընդունվի, մենք կգնանք մեկ քայյլ առաջ», -խոսելով սահմանադրական բարեփոխումների մասին՝ ասաց ՀՀ վարչապետ Հովիկ Աբրահամյանը «Ռ-Էվոլյուցիա» հաղորդման շրջանակներում: Ապա ՀՀ վարչապետն ավելացրեց, որ 2015 թ-ին տնտեսության մեջ արձանագրվել են դրական տեղաշարժեր գրեթե բոլոր ոլորտներում:

Անդրադառնալով հայ-իրանական հարաբերություններին՝ վարչապետը նշեց, որ Հայաստանի հարաբերությունները Իրանի հետ շատ ջերմ են քաղաքական առումով, իսկ տնտեսական տեսանկյունից արդեն արվում են որոշակի քայլեր: Առաջիկայում լինելու է հայ -իրանական բիզնես ֆորում, որը հնարավորություն կտա գործարարներին շահավետ պայմանավորվածություն ձեռք բերել Իրանի հետ:

«Ռ-Էվոլյուցիա» հաղորդման ժամանակ Հովիկ Աբրահամյանն անդրադարձավ նաև ՀԷՑ-ի գնման գործընթացին և մասնավորապես նշեց, որ դա շատ արդյունավետ գործարք է համարում և շատ ճիշտ քայլ, ապա ավելացրեց, որ իրենք են դեռ ամիսներ առաջ առաջարկել Սամվել Կարապետյանին գնել ՀԷՑ-ը և վերջինս ականջալուր լինելով խնդրանքին գնել է, հաշվի չառնելով այն հանգամանքը որ այդ գործարքը բիզնես տեսանկյունից արդյունավետ չէր, այդուամենայնիվ, Սամվել Կարապետյանը, չմերժելով կատարեց մեծ քայլ, որպեսզի օգնի մեր ժողովրդին:

ՀՀ վարչապետը նույն հաղորդման ժամանակ խոսեց նաև խաղողի մթերման ժամանակ առաջացած խնդրի մասին և նշեց, որ որևէ մեկի խաղողը այգում չի մնա, սակայն գյուղացին ևս պետք է հասկանա խաղող ընդունող ընկերություններին: Այս տարի ռուսական ռուբլու արժեզրկմամբ պայմանավորված, արտահանումները նվազել են և կառավարությունը ի զորու չի բարձրացնել ռուբլին: Ինչ վերաբերում է խաղողի ընդունման գնին, ապա դա կախված է որակի հետ:

Եվ վերջում հաղորդումն ավարտվեց հուսադրող վերջաբանով: Վարչապետ Հովիկ Աբրահամյանը վստահեցրեց, որ ամեն ինչ արվելու է, որ յուրաքանյչուր մարզում ստեղծվեն աշխատատեղեր, այդ առիթով արդեն բանակցություններ է վարում դրսում ապրող մեր գործարար հայրենակիցների հետ, իսկ վերջիններս էլ նրա հորդոր- խնդրանքը չեն մերժի: Ապա կոչով դիմեց հասարակությանը՝ զինվել համբերությամբ և հավատալ, որ ամեն բան լավ է լինելու: