Հերիք է շարժվես, Բրաբիոն ես, ինչ ես...

Comment

Ո՞նց կլինի ՀՀԿ-ն մի բան անի, ԲՀԿ-ն էլ հետ մնա. Հնարավոր չի: Որպես «այլընտրանք»՝ իրենք պետք է ներկայացնեն ամեն ինչի այլընտրանքը: Օրինակ եթե հանրապետականներն ունեն երկրապահ կամավորականների միություն, այլընտրանքայինները պետք է ստեղծեն Երդվյալ ազատամարտիկների միություն, կամ եթե ՀՀԿ-ական մականունավոր օլիգարխներ, պետք է լինեն այլընտրանքային մականունավորներ: Օրինակ, Ծաղիկ Ռուբո: Ի՞նչ վատ մականուն է որ... Ծաղկող, բարգավաճող... շատ համահունչ է իր կուսակցության էությանը: Եվ ահա այսպես ծաղկելով նաև հարստանում, ծաղկեցնում ու հարստացնում է նաև իր դստերը՝ փորձելով պատգամավոր դարձնել, իսկ վերջերս էլ ավելի ծաղկելով՝ նոր կառույց է ստեղծում, կռվող տղերքի է հավաքում իր շուրջը, նույնիսկ մարզային հանդիպումներ կազմակերպում, մեդալներ բաժանում: Բայց ախր այդ ամենը ծախս է, չէ՞, և մենք էլ այդքան հիմար չենք, որ հավատանք, թե օլիգարխն այդ ծախսերն անում է զուտ մարդասիրական դրդումներից մղված և միմիայն իր գրպանից:

Վերջիվերջո օլիգարխ է, չէ՞, այն էլ՝ մականունավոր օլիգարխ: Իսկ օլիգարխը չի կարող մարդկանց լավություն անել առանց դրա մեջ մի օգուտ ունենալու կամ էլ առանց ավելի վերևում կանգնած ինչ-որ մեկի պատվերը կատարելու: Կռվող տղերքով շրջապատված լինելը պետքական բան է, հեռանկարային է: Հետո Ռուբեն Գևորգյանն այն ֆիգուրը չէ, որ ինքն իրենով նման նախաձեռնություն անի, դեռ մի բան էլ քննադատի իշխանություններին, մեղադրի իրեն խոչընդոտելու մեջ, եթե իհարկե նրան ինչ-որ մեկն ավելի համարձակ չի դարձրել…

Թե չէ Ռուբեն Գևորգյանը մարդ է, պոետ, թեկուզ՝ պատգամավոր, թեկուզ՝ հարուստ, բայց ընդամենը մարդ է, ծաղիկ... Հիշում եք չէ՞, ոնց լուսահոգի Կարեն Սերոբիչը մի անգամ ԱԺ-ում նիստի ժամանակ մեր հերոսին դիտողություն արեց, թե հերիք է շարժվես, Բրաբիոն ես, ինչ ես...

Արտյոմ   Եդիգարյան