Հեղափոխության գինը. Փաշինյանի թիմակիցներին՝ միլիարդներ, ժողովրդին՝ գրոշներ

Հայաստանի վարչապետ Նիկոլ Փաշինյանի կառավարությունը վերջապես որոշեց արձագանքել hetq.am-ի բացահայտմանը, ըստ որի` սույն թվականի մայիսի 1-ից Փաշինյանի հրամանով նախարարների աշխատավարձերը 100 տոկոսով բարձրացել են՝ կազմելով 1 միլիոն 500 հազար դրամ, փոխնախարարներինը՝ 1 միլիոն դրամ, մարզպետներինը՝ 900 հազար դրամ...
Շատ լավ կլիներ, եթե պարոն Փաշինյանի վարչակարգն ընդամենը հաստատեր այս տեղեկության իսկությունը, բայց ոչ պարզաբաներ, քանի որ պարոն Կարապետյանի պարզաբանումից նորմալ մարդու մոտ, բացի սրտխառնոցից, ուրիշ զգացողություն չի կարող առաջանալ... Պարզվում է, որ Փաշինյանն իր յուրայինների աշխատավարձը ծածուկ չի բարձրացրել, այլ, ըստ նրա մամլո խոսնակի՝ գաղտնի է դա արել ու նույն hetq.am-ի հարցմանը հենց այդպես էլ պատասխանել են՝ "«Ձեր կողմից բարձրացված հարցը, ինչպես նշել եք, իրականացվել է գաղտնի ընթացակարգով, ուստի նման տեղեկատվությունը հրապարակման ենթակա չէ"...
Պարոն Կարապետյանը պարզաբանել է, որ ամեն դեպքում տարեվերջին հասարակությունը միևնույն է, իբրև թե կիմանար այդ բարձրացման մասին, քանի որ "նախարարները տարվա արդյունքներով լրացնում են հայտարարագրեր, որոնք հասանելի են ցանկացած քաղաքացու համար... Հարց է ծագում... Նախ, եթե տեղեկութոնը գաղտնի չէր, ինչու՞ չէիք հրապարակում հենց մայիսի 1-ին, երբ ձեր կառավարության շատ դեպքերում անգրագետ և դիլետանտ նախարարների աշխատավարձերը 100 տոկոսով բարձրացնում եք, այդ հարցի վերաբերյալ լրատվամիջոցի հարցմանը կոնկրետ պատասխան չեք տալիս՝"այո" կամ՝ "ոչ" և միայն արձագանքում եք բարձրացված աղմուկից հետո... Պարզվում է, ըստ Փաշինյանի մամլո խոսնակի, ժամանակին, երբ նույն Փաշինյանի "դաբռոյով" իր գյորմամիշ թիմակիցներն իրենք իրենց ահռելի պարգևավճարներ տվեցին, պարոն վարչապետը կարծիք էր հայտնել, որ նախարարները պետք է բարձր աշխատավարձ ստանան և " պետք չէ նախարարին մեղադրել կենսաթոշակառուից բազմապատիկ անգամ ավել աշխատավարձ ստանալու մեջ, քանզի նախարարի աշխատանքի որակից է կախված թոշակառուի հետագա բարեկեցության մակարդակը"... Ամո՛թ է, ամո՛թ... Պարոն Փաշինյանի կառավարության 95 տոկոսը դիլետանտներ են և այս 1,5 տարվա մեջ եզակիները կարող են ասել, որ ինչ-որ ոլորտում հաջողության են հասել...Հետաքրքիր է, ո՞ր "թոշակառուի" կարծիքն է հարցրել պարոն վարչապետը, որ այդ քայլին է գանցել... Պարոն Փաշինյանն առանց հասարակության կարծիքը հաշվի առնելու և առանց իրազեկելու, հարազատ կուսակիցներին և թիմակիցներին միլիարդավոր դրամներ է նվիրում պետբյուջեից, իսկ հասարակ քաղաքացուն "կերակրում" գրոշներով, որի մասին իր պարզաբանման մեջ հիշեցնում է պարոն Կարապետյանը՝ ակնարկելով, որ "այս մեկուկես տարվա ընթացքում Հայաստանում բազմաթիվ քաղաքացիների աշխատավարձերի, թոշակների, նպաստների բարձրացումներ են տեղի ունեցել"...
Այո՛, Հայաստանի 497 394 թոշակառուից 2019 թ-ի հունվարի 1-ից մոտ 8 հազար դրամով բարձրացվել է 20-21 հազար մարդու թոշակ... Սույն թվականի սեպտեմբերի 1-ից 10 տոկոսով բարձրացվել են ուսուցիչների աշխատավարձերը, 20 տոկոսով բարձրացվել են ոստիկանության աշխատողների աշխատավարձերը, սակայն չեղարկվել են նույն ոստիկաններին տարեկան 4 անգամ վճարվող հավելավճարները, որի արդյունքում պարզվում է, որ ոստիկանների աշխատավարձերը չեն էլ բարձրացվել, իսկ վերջերս էլ բարձրացրեցին ԱԻՆ-ի աշխատակիցների աշխատավարձերը... Ստացվում է, որ պարոն Փաշինյանը հարազատ թիմակիցների աշխատավարձերը բարձրացնում է 100 տոկոսով, իսկ սովորական մահկանացուներին էլ գրոշներ է տալիս...
Վարչապետի մամլո խոսնակը նաև հպարտորեն հայտարարում է՝ " 2020 թ-ի դրությամբ Հայաստանի հարյուր հազարավոր քաղաքացիների աշխատավարձեր բարձրացված կլինեն՝ հեղափոխությունից հետո"... Այո, համեմատած նախարարների, մարզպետների հետ մի քանի "գրոշով" կավելանա... Բայց պարոն Կարապետյանը, լավ կլինի բացահայտի, թե ի՛նչ կարժենա 2020 թ-ի հունվարի 1-ից գազը հայաստանյան սպառողների համար, քանի որ թանկացման դեպքում կթանկանան նաև առաջին անհրաժեշտության ապրանքների և ծառայությունների արժեքները, որը ոչ միայն "կխժռի" այդ բարձրացումը, այլև էլ ավելի կմեծանան մարդկանց ծախսերը...
Ի դեպ, ըստ պարոն Կարապետյանի, 2020 թ-ին Հյաստանում սպասվում է հեղափոխություն... Այո, եթե պարոն Փաշինյանի կառավարությունն այս մեթոդներով շարունակի ղեկավարել երկիրը՝ վեր դասելով սեփական և թիմային շահերը պետականից, իրոք, չի բացառվում, որ պարոն Փաշինյանը և նրա հետ իշխանության եկած քայլած "պատուհասները" շատ արագ զրկվեն իշխանությունից...
Հ.Գ. Որքան հասկացա, պարոն Կարապետյանին հանգիստ չեն տալիս Գալուստ Սահակյանի դափնիները... Ըստ Փաշինյանի մամլո խոսնակի` ստացվում է, որ "գաղտնին" դա "ծածուկը" չէ... Իսկ եթե լուրջ՝ ավելի լավ կլիներ, եթե Վլադիմիր Կարապետյանն ընդհանրապես չպարզաբաներ աշխատավարձերի բարձրացման հետ կապված այս խայտառակ պատմությունը...