ՀՖՖ-ն բանակցում է միջազգային մարզիչների հետ

Հայաստանի Ֆուտբոլի ֆեդերացիայի նախագահ Ռուբեն Հայրապետյանն այսօր հրավիրված մամուլի ասուլիսի ժամանակ հայտարարեց, որ այժմ բանակցում են մի քանի միջազգային մասնագետների հետ հավաքականը գլխավորելու հարցի շուրջ։ «Ինչ վերաբերում է նոր մարզչին, ես շատ ափսոսում եմ եւ կուզենայի Վարդան Մինասյանի հետ աշխատել` իմանալով նրա նվիրվածությունը մեր հավաքականին ու առհասարակ հայկական ֆուտբոլին: Անկեղծ եմ ասում` ես կուզենայի, որ Վարդան Մինասյանը մնար, արդեն երկու անգամ փորձել եմ ու դեռ կփորձեմ: Վարդանը բարձր կարգի մարզիչ է, ես ավելի լավ գիտեմ, թե մեր մարզիչներից ով ինչ կարողություններ ունի` նա ինտելեկտուալ մարզիչ է»,- ափսոսանք հայտնեց Ռուբեն Հայրապետյանը եւ հավելեց, որ բանակցել է նաեւ Միշել Տեր-Զաքարյանի հետ, սակայն նա մերժել է: Ռուբեն Հայրապետյանը նշեց, նաեւ, որ Վարդան Մինասյանն իրեն խորհուրդ է տվել որ հավաքականի մարզիչը լինի կամ իսպանացի, կամ իտալացի: «Բայց չի բացառվում, որ կարող է լինել, օրինակ, գերմանացի: Ես մի քանի անգամ սխալվել եմ մարզչի հարցում, հիմա չեմ ուզում սխալ թույլ տալ: Պետք է նոր մարզիչը հոգով և սրտով աշխատի հավաքականի հետ, պետք է կարողանա շատ արագ ընտելանալ թիմին»,- ասաց Ռուբեն Հայրապետյանը:

Անդրադառնալով Վարդան Մինասյանի կատարած աշխատանքին, պարոն Հայրապետյանը նշեց. «Հիշենք, թե երբ Վարդան Մինասյանը եկավ գլխավորելու մեր հավաքականը, մենք ՖԻֆԱ-ում որ տեղում էինք եւ հիմա որ տեղում ենք` Վարդան Մինասյանը իրոք խթանեց մեր ֆուտբոլի զարգացմանն էլ, առաջընթացին էլ»: Ռուբեն Հայրապետյանի հավաստմամբ Վարդան Մինասյանը պատրատ է միշտ օգնել մեր հավաքականին` աշխարհի որ ծայրում էլ լինի. «Ուղղակի նա չի ուզում լինի ազգային հավաքականի գլխավոր մարզիչ: Բոլորս էլ սխալներ ունենում ենք: Վարդանը փայլուն մարզիչ է»: