ՀՀ ՊՆ-ն Խաղաղապահական գործողությունների միջազգային ֆորումի անդամ է դարձել

Ապրիլի 8-ին Պաշտպանության նախարարի առաջին տեղակալ Դավիթ Տոնոյանը ընդունել է «Խաղաղապահական գործողությունների մարտահրավերների միջազգային ֆորումի» պատվիրակությանը` տնօրեն Աննիկա Հիլդինգ-Նորբերգի գլխավորությամբ:

ՊՆ մամուլի ծառայությունից հայտնում են, որ նույն օրը կայացել է պատվիրակության այցը Պաշտպանության նախարարության Ազգային ռազմավարական հետազոտությունների ինստիտուտ:

Պաշտպանության նախարարի առաջին տեղակալ Դավիթ Տոնոյանի հետ հանդիպման նպատակն էր քննարկել այս տարվա հոկտեմբերի 5-6-ը Երեւանում կայանալիք «Խաղաղապահական գործողությունների մարտահրավերների ֆորումի» ամենամյա խորհրդաժողովի նախապատրաստական աշխատանքները: Դավիթ Տոնոյանը շեշտել է Հայաստանի շահագրգռվածությունը՝ խորացնելու համագործակցությունը ֆորումի հետ եւ կարեւորել ֆորումի ամենամյա խորհրդաժողովը Հայաստանում անցկացնելու հանգամանքը:

Հարկ է նշել, որ Ֆորումի միջազգային գործընկերների կոմիտեն խաղաղապահության` ՄԱԿ-ի գործող հայեցակարգի հեղինակն է: Պատվիրակության ղեկավար Աննիկա Հիլդինգ-Նորբերգը, պատվիրակության անդամներ Յիբեկա Ջոնսոնը եւ Անդրեա Ռաբուսն իրենց գոհունակությունն են հայտնել ՀՀ պաշտպանության նախարարության հետ համագործակցության բարձր մակարդակի կապակցությամբ:

Ազգային ռազմավարական հետազոտությունների ինստիտուտում կայացած գիտակիրառական քննարկմանը մասնակցում էին Ինստիտուտի պետ, Պաշտպանության նախարարի խորհրդական, քաղաքական գիտությունների դոկտոր-պրոֆեսոր, գեներալ-մայոր Հայկ Քոթանջյանը, Ինստիտուտի պետի տեղակալ-Վերլուծական կենտրոնի պետ, պատմական գիտությունների թեկնածու Բենիամին Պողոսյանը, Արտաքին գործերի նախարարության ՆԱՏՕ-ի բաժնի վարիչ, քաղաքական գիտությունների թեկնածու Գագիկ Հովհաննիսյանը, Ինստիտուտի Վերլուծական կենտրոնի Ռազմավարական խաղերի խմբի պետ, քաղաքական գիտությունների թեկնածու Միքայել Ավետիսյանը:

Ողջունելով գործընկերներին, Հայկ Քոթանջյանը կարեւորել է ֆորումի հետ Ազգային ռազմավարական հետազոտությունների ինստիտուտի արդյունավետ համագործակցությունը, որը մեկնարկել է 2014 թ. գարնանը: Համագործակցության շնորհիվ 2014 թ. հուլիսի 1-2-ը Երեւանում անցկացվեց «ՄԱԿ-ի սկզբունքների եւ ստանդարտների հիման վրա ազգային եւ տարածաշրջանային խաղաղարարական ներուժերի ինտեգրումը խաղաղ օպերացիաների համընդհանուր համակարգում» թեմայով միջազգային ռազմավարական քաղաքական ֆորումը, որի աշխատանքներում ներգրավված էին մասնակիցներ ՄԱԿ-ից եւ աշխարհի 12 պետություններից:

Երեւանում անցկացված ֆորումի արդյունքների հիման վրա Հայաստանի Հանրապետությունը, հանձինս Պաշտպանության նախարարության Ազգային ռազմավարական հետազոտությունների ինստիտուտի, 2014 թ. հոկտեմբերին Պեկինում կայացած «Խաղաղապահական գործողությունների մարտահրավերների միջազգային ֆորումի» ամենամյա խորհրդաժողովում ձեռք բերեց անդամության կարգավիճակ՝ դառնալով գործընկեր պետություն: Հայաստանից բացի, տվյալ Ֆորումին անդամակցում է աշխարհի 20 պետություն, այդ թվում՝ ՄԱԿ-ի անվտանգության խորհրդի մշտական 5 անդամները:

Մասնագիտական քննարկման ընթացքում ճշգրտվեցին Երեւանում կայանալիք խորհրդաժողովին առնչվող բովանդակային եւ կազմակերպական մի շարք հարցեր: Խորհրդաժողովը «Խաղաղապահական գործողությունների մարտահրավերների միջազգային ֆորումի» գործընկերների գլխավոր հավաքն է, որին, ըստ ավանդույթի, մասնակցում են ՄԱԿ-ի ղեկավարության ներկայացուցիչներ եւ խաղաղապահության ոլորտում աշխարհի առաջատար մասնագետներ: Քննարկման մասնակիցները կարեւորեցին, որ Ազգային ռազմավարական հետազոտությունների ինստիտուտն ունի միջազգային ֆորումների կազմակերպման զգալի փորձ, մասնավորապես՝ 2008-2014 թվականներին կազմակերպել է նմանատիպ 7 ֆորումներ: Ինստիտուտի կողմից կազմակերպվող ֆորումները դարձել են աշխարհաքաղաքական տարբեր դերակատարներին կամրջող, միջազգային անվտանգության եւ խաղաղապահության խնդիրներին նվիրված ակադեմիական ձեւաչափով գիտակիրառական քննարկումների ուրույն հարթակ:

Հանդիպման ընթացքում հյուրերին ներկայացվեց նաեւ ԱՄՆ Պաշտպանական ազգային համալսարանի ակադեմիական խորհրդատվությամբ իրականացվող Ազգային ռազմավարական հետազոտությունների ինստիտուտի կերպափոխմամբ` 2015 թվականին մեկնարկելիք Պաշտպանական ազգային հետազոտական համալսարանի ստեղծման ծրագիրը: