ՀՀ սպառողական շուկայում 2014թ.-ի ընթացքում գնանկման միտում կա. ԱՎԾ աշխատակից

Ազգային վիճակագրական ծառայության գների վիճակագրության և միջազգային համադրումների բաժնի պետ Գուրգեն Մարտիրոսյանի փոխանցմամբ՝ Հայաստանի սպառողական շուկայում 2014թ.-ի ընթացքում արձանագրվել է գնանկման միտում: Վերջին 9 ամիսներից 5 ամիսների ընթացքում արձանագրվել է գնանկում, և ընդհանուր գնանկումը կազմել է 4.6% տոկոս:

«Գնաճ արձանագրվել է հունվարին` 2.8%, ապրիլին`0.5% և վերջին երկու ամիսներին` օգոստոսին` 0.7%, սեպտեմբերին` 0.4%: Նախորդ տարվա սեպտեմբերի համեմատ սպառողական շուկայում նկատվել է գների նվազում 0.8%-ով»,- այսօր կայացած ասուլիսին տեղեկացրեց նա:

Գուրգեն Մարտիրոսյանը տեղեկացրեց, որ այս տարվա սեպտեմբերին օգոստոսի համեմատ աճեն են պարենային ապրանքների գները, իսկ ծառայությունների ոլորտում սակագների նվազում է արձանագրվել:

Պարենային 13 ապրանքային խմբերից 10-ում արձանագրվել է գնաճ՝ 0.1%-9.4%: Ընդ որում՝ ամենաբար գնաճը արձանագրվել է ձվի շուկայում` 9.4%, ինչպես նաև բանջարեղենի ու կարտոֆիլի ապրանքային խմբում` 5.2%:

Բանախոսի ներկայացմամբ՝ ոգելից խմիչքի ու ծխախոտի գները անփոփոխ են մնացել:
Վերջին 10 տարիների դինամիկայից նկատվում է, որ 2008-ին, 2007, 2012, 2014 թվականների 9 ամիսների կտրվածքով արձանագրվել է գների նվազում, իսկ ամենաբարձր գնաճն արձանագրվել է 2010 թվականին:

Սեպտեմբերին Հայաստանի 7 քաղաքներում արձանագրվել է 0.1-0.5% գնաճ, ամենաբարձրը եղել է Գյումրիում ու Երևանում, ամենացածր գնաճն արձանագրվել է Եղեգնաձորում, Վանաձորում, Գավառում, իսկ Էջմիածնում ու Իջևանում գները մնացել են անփոփոխ:

Հարցին, թե մոտ ապագայում թանկացումներ սպասվում են, թե ոչ, բանախոսը պատասխանեց. «Դա կանխատեսում է, որը մեր գործառույթի մեջ չէ, բայց վերջին տասնօրյակի մեր գնահատումները ցույց են տվել, որ միրգ ու բանջարեղենի գծով էական գնաճ չի արձանագրվել, և եթե նախորդ տարիների համեմատությամբ նայենք, հոկտեմբերին ու նոյեմբերին բարձր գնաճ է արձանագրվում»: