ՀՀ տրանսպորտի նախարարը քննարկել է «Հյուսիս-հարավ ճանապարհային միջանցք» ծրագրի ընթացքը

ՀՀ տրանսպորտի և կապի նախարար Գագիկ Բեգլարյանը դեկտեմբերի 17-ին ընդունել է Ասիական զարգացման բանկի ներկայացուցիչներին` բանկի Կենտրոնական և Արևմտյան Ասիայի տարածաշրջանի գլխավոր տնօրեն Կլաուս Գերհաուզերի գլխավորությամբ:

 Այս մասին հայտնում են ՀՀ տրանսպորտի և կապի նախարարության լրատվական ծառայությունից:

Հանդիպման ընթացքում կողմերը քննարկել են «Հյուսիս-հարավ ճանապարհային միջանցք» ներդրումային ծրագրի ընթացքը, ընդգծել են Հայաստանի համար դրա խոշոր ռազմավարական նշանակությունը, կարևորել են երկկողմ համագործակցությունը:

 Գագիկ Բեգլարյանը ինչպես նախորդ հանդիպումների ժամանակ, այս անգամ ևս շեշտել է, որ նախարարության գերխնդիրը որակյալ ճանապարհ ունենալն է:

«Ծրագրի իրականացման ընթացքում առաջացել էին բավականին խնդիրներ: Ժամանակին կատարված համապատասխան միջամտությունից հետո դրանք արագ շտկվեցին: Այսօր աշխատանքները բնականոն ընթանում են: Թույլ չենք տալու ո՛չ շինարարական, ո՛չ վերահսկող ընկերությանը աղավաղել աշխատանքների ընթացքը, խոչընդոտել բարձր որակի ապահովումը: Բոլոր խնդիրների հիմքում ընկած է շինարարների խստապահանջ աշխատանքի և որակի ապահովումը»,-ասել է նախարարը:

Երրորդ և չորրորդ տրանշերին անդրադառնալով՝ Գագիկ Բեգլարյանը նշել է, որ ընթացիկ փոփոխություններին, խնդիրներին արագ արձագանքելով՝ հնարավորություն կլինի հետագայում զերծ մնալ բոլոր այն դժվարություններից, որոնք եղել են առաջին և երկրորդ տրանշերի շինարարության ժամանակ:

Կլաուս Գերհաուզերին որակի ապահովման վերաբերյալ նախարարի մտահոգությունների առնչությամբ նշել է, որ Ասիական զարգացման բանկը ևս շահագրգռված է ծրագրի բարեհաջող ավարտով: