ՀՀ-ն դրանից որեւէ բացասական բան չի ունենա

Տնտեսագետ ՎԱՐԴԱՆ ԲՈՍՏԱՆՋՅԱՆԸ, Fnews.am-ի հետ զրույցում  անդրադառնալով մեկ միասնական արժույթ ունենալու հեռանկարին ասաց.
-Առհասարակ ցանկացած տնտեսական միության արդյունավետ գործելու խնդիրներից մեկը միասնական արժույթ ունենալն է, դա բնորոշ գիծ է բոլոր տնտեսական միություններին, բայց, ինչ խոսք կարող է նաեւ չլինել: Հիմա ԵՏՄ-ի կտրվածքով` ՌԴ-ն, որպես միության ձեւավորման առումով առաջատար երկիր, առաջարկել է, որպեսզի ԿԲ-ները քննարկեն այդ հեռանկարը: Եթե այդպիսի միասնական արժույթ լինի, ապա ես հակված եմ մտածելու, որ ՀՀ -ն դրանից հաստատ բացասական որեւէ բան չի ունենա: Իհարկե, որոշ վերլուծաբաններ հայտարարում են, որ մեկ միասնական համակարգի անցումը մեր ինքնորոշության, ինքնիշխանության մասնակի կորուստ է, բայց նման հայտարարություններ անողները շատ լավ գիտեն, որ ընդհանուր գործունեության արդյունավետությունը` տնտեսական շրջանառության կտրվածքով կոմպեսացնում է,այդ, այսպես կոչված ինքնուրույնության որոշակի կորուստը: Ամեն դեպքում մեկ միասնական համակարգի անցնելու հեռանկարները այդքան առարկայական եւ այդքան հստակ չեն, որովհետեւ ԵՏՄ-ն անկախ այն հանգամանիքից, որ ՀՀ-ն 2015 թվականի հունվարի մեկից համարվում է ԵՏՄ-ի անդամ պետություն, այնուհանդերձ ԵՏՄ-ն, որպես այդպիսին գտնվում է ձեւվորման փուլում, ունի որոշակի խոցելի տեղեր, եւ պայմանավորված վերոնշյալ հանգամանքներով, բնականաբար, միասնական արժույթի անցնելու հետ կապված եւս կլինեն դժվարություններ: Մինչեւ անգամ կա հավանականություն, որ միասնական արժույթ չի ձեւավորվի, բայց բոլոր դեպքերում տնտեսական միություններում` միասնական արժույթ ձեւավորելու առումով հավանականությունը բավականաչափ մեծ է, եւ որպես, կանոն նման համակարգ աշխատում է տարբեր տնտեսական միություններում: Մասնավորապես Եվրոմիությունում, բայց այնուհանդերձ ԵՏՄ-ում առաջիկա տարիներին դա չի կարող լինել, քանի որ ընդհանրապես դրամաշրջանառությունը` ենթադրում եւ պահանջում է բազմաթիվ հարաբերությունների կարգավորում, որոնք դեռւս գտնվում են չկարգավորված, չկորդինացված վիճակում: Եթե այդ կարգավորման հեռանկարը լինի ցանկալի բոլոր ԵՏՄ անդամ երկրների համար, ուրեմն մի քանի տարի հետո նոր միայն հնարավոր է անցումը միասնական արժույթի:
Տնտեսագետի խոսքով."Մեկ միասնական արժույթ ձեւավորվելուց հետո էական նշանակություն չի ունենա, թե մենք ինչ անուն կդնենք` դրամ, ռուբլի կամ ուրիշ բան այդ արժույթին, դա բացարձականապես նշանակություն չունի: Փաստորեն, դա միջոց է ընդհանուր տնտեսական շրջանառությունը իրականացնելու եւ ֆինանսական համակարգը ապահովվելու համար: Եվ այդ կտրվածքով, թե միասնական արժույթը ինչ անուն կկրի դա որեւէ նշանակություն ունենալ չի կարող":

Հիշեցնեք, որ Ռուսաստանի նախագահ Վլադիմիր Պուտինը երկրի Կենտրոնական բանկին եւ կառավարությանը հանձնարարել է որոշել Եվրասիական տնտեսական միության շրջանակում արժութային եւ ֆինանսական ինտեգրման հետագա ուղղությունները, ինչպես նաեւ ուսումնասիրել ապագայում արժութային միության ստեղծման նպատակահարմարությունն ու հնարավորությունը:

Սոնա Ավագյան