ՀՀ-ում շատ մեծ Է քաղաքացիական պատերազմի վտանգը

Ճանապարհները բացվելուն պես՝ ՀՀ-ից ամենաքիչը 250-300 հազար մարդ անմիջապես կլքի երկիրը

«Հայաստանի հանրապետությունը այսօր կանգնած է ավելի մեծ վտանգի առաջ, քան երբեւէ: ՀՀ վարչապետի պաշտոնը զբաղեցնող դավաճանը, այսօր էլ ուղիղ եթեր էր մտել՝ փորձելով համոզել հայ ժողորդին, որ որեւիցէ կտոր հող ՀՀ-ից Ադրբեջանին չի անցնում: Ես չեմ էլ ուզում այդ թեման քննարկել, որովհետեւ անցնում է թե ոչ՝ արդեն երկրորդական է: Կա ավելի մեծ վտանգ. պատկերացրեք Սյունիքի մարզի մոտավորապես երեսուն բնակավայրեր Նիկոլի ազգադավ կապիտուլյացիայի արդյունքում՝ դարձել են սահմանամերձ: Որոնցից տասներեք բնակավայրի պաշտպանական դիրքերը՝ Փաշինյանի ստորության արդյունքում, տեղափոխվում են. այդ դիրքերը զբաղեցնում են ադրբեջանցիները, իսկ մեր դիրքերը ոչ բարենպաստ վիճակում են գտնվում»,- Newsmedia.am-ի հետ զրույցում անդրադառնալով սահմազատումներին եւ ՀՀ-ի սահմաններին առկախված վտանգներին, ասաց հայտնի քաղաքական վերլուծաբան, պատմաբան Գագիկ Համբարյանը, հավելելով.

-Հիմա պատկերացրեք, բարենպաստ դիրք զբաղեցնող ադրբեջանցին սկսում է վերահսկել ՀՀ-ի տարածքում տեղի ունեցող ամեն ինչը: Այս պարագայում ՀՀ-ից տարածք գրավելը` ադրբեջանցիներին բացարձակ պետք էլ չէ: Իրենք համապատասխան դիրքի վրա նստած, շատ մեծ շառավիղով տարածքներ են վերահսկում՝ կոնկրետ Սյունիքի մարզում: Այդ կերպ կարողանալով մեծ խնդիրներ ստեղծել ե՛ւ քաղաքացիական հատվածի, ե՛ւ թե զինվորականների համար:
Փաշինյանի այն հայտարարությունը, որ մենք մի թիզ հող չենք զիջել՝ ուղղակիորեն մանիպուլյացիա է: Լավ կլինի, Փաշինյանը պարզաբանի. թե իր կողմից միակողմանի Ալիեւին հանձնած դիրքերի արդյունքում՝ վերջիններս ՀՀ-ում քանի հազար քմ. տարածքի վերահսկողություն են ստանում: Ի դեպ ասեմ, որ Սյունիքի բնակիչները շատ լավ հասկանում են դա: Այնպես որ, Փաշինյանը իր զառանցանքները հատուկ ուղղում է ՀՀ-ի աշխարհագրությունից շատ հեռու անձանց՝ ովքեր չեն էլ պատկերացնում պահի ու խնդրի լրջությունը:
Ավելին, այսօրվա իր ելույթում նա մեսիջներ հղեց, որ մենք էլի ենք տարածքներ զիջելու Ադրբեջանին, որպեսզի անխափան գործի Գորիս-Կապան ճանապարհը, որի երկու հատվածները անցնում են Ադրբեջանի տարածքով:

-Պարոն Համբարյան հնարավոր համարում ե՞ք, որ ստեղծված իրավիճակում հայ-ադրբեջանական սահմանին կրկնվի այն նույն սցենարը, որը որ ունեցանք Արցախում: Ի վերջո, ո՞վ է այսօր ՀՀ-ի անվտանգության երաշխավորը, որովհետեւ մենք տեսնում ենք, որ օր-օրի հայտնվում ենք առավել քաոսային ու անհասկանալի իրավիճակում:

-Հայ-ադրբեջանական սահմանին լայնամաշտաբ ռազմական գործողություններ տեղի չեն ունենա, որովհետեւ նախ եւ առաջ ՀՀ-ն հատուկ համապատասխան պայմանագիր ունի՝ ՌԴ-ի հետ: Ի դեպ, առիթից օգտվելով հատուկ ընդգծեմ, որ Փաշինյանը այսօր փորձում էր իր կապիտուլյացիոն ակտը բացատրել ոչ միայն նրանով, որ ինքը իբրեւ թե 15-30 հազար կյանքեր է փրկել Արցախում, այլ նաեւ նշեց, որ իբրեւ թե եթե չդադարեցներ պատերազմը՝ ռազմական գործողությունները կտեղափոխվեին Սյունիք, ապա Նախիջեևան: Տարրական սուտ, քանի որ ՀՀ-ն եւ ՌԴ-ն ունեն համապատասխան համաձայնագիր, որի համաձայն ՌԴ-ն հանդիսանում է ոչ միայն հայ-թուրքական եւ հայ-իրանական սահմանի անձեռնմխելիության երաշխավորը, այլ նաեւ հայ-ադրբեջանական եւ հայ-վրացական:

-Իսկ քաղաքացիական բախումների վտանգ ՀՀ-ում տեսնում ե՞ք, պարոն Համբարյան:

-Այո, ես ավելի շատ վախենում եմ քաղաքացիական պատերազմից ՀՀ-ում: Որովհետեւ Փաշինյանը այսօր Եռաբլուրում հասարակությանը տարավ երկու կողմերին պառակտմանը, որի հետեւանքները ոչ մի լավ բան չեն հուշում: Այնպես որ, ես ավելի շատ մտահոգ եմ ոչ թե հայ-ադրբեջանական պատերազմից, որովհետեւ Փաշինյանը՝ Ադրբեջանի բռնապետի բերանից ելած ամեն մի ցանկություն կատարում է վայրկյանապես, այլ այսօր ՀՀ-ում շատ մեծ է քաղաքացիական պատերազմի վտանգը:

-Ստեղծված իրավիճակում, կանխատեսում ե՞ք արտագաղթի նոր ալիք, հատկապես երբ բացվեն ճանապարհները:

-Ոչ միայն այս իրավիճակով պայմանավորված, այլ ընդհանրապես պատերազմը սկսվելուց ի վեր՝ կար նման անհանգստություն: Այսօր առավել քան վստահ եմ, որ ճանապարհները բացվելուն պես՝ ՀՀ-ից ամենաքիչը 250-300 հազար մարդ անմիջապես կլքի երկիրը: Այնպես որ, Նիկոլ Փաշինյանի կառավարությունը ուղղակիորեն աղետ էր ՀՀ-ի համար:

Պատրաստեց՝ՆՈՆԱ ԱԴԱՄՅԱՆԸ