ՀՀԿ պատգամավոր Լևոն Մարտիրոսյանը առաջարկելու է Քիմ Քարդաշյանին տանել ԱԺ եւ զարմացնել

Ազգային ժողովի Հանրապետական խմբակցության պատգամավոր Լեւոն Մարտիրոսյանը առաջարկելու է, որպեսզի Հայաստան ժամանող ամերիկյան հեռուստաստղ Քիմ Քարդաշյանին տանեն Ազգային Ժողով: Այս մասինNEWS.am-ի թղթակցի հետ զրույցում ասաց Լեւոն Մարտիրոսյանը:

Ավելին, նա պատրաստ է նույնիսկ անցագիր իջեցնել Քիմ Քարդաշյանի համար: Հարցին, թե տանում եք ԱԺ, որ ինչ անեք, պատգամավորը պատասխանեց՝ «որպեսզի զարմացնենք նրան մեր պատգամավորների գեղեցիկ տեսքով, ինտելեկտուալ մակարդակով»:

 «Լավ տեղերը կտանենք՝ Սեւան, Գառնի, Գեղարդ, կարող է նաեւ Արցախ տանենք, կտեսնենք, Ազգային ժողով կարող է բերենք, նիստեր ունենք մյուս շաբաթ, կարող է եռօրյային բերենք: Ես կառաջարկեմ, որ նրան Աժ տանենք, պրոպուսկը ես կտամ: Տանենք ԱԺ, որ զարմացնենք մեր պատգամավորների գեղեցիկ տեսքով, ինտելեկտուալ մակարդակով, որ աղջիկը իմանա, որ տենց հայրենակիցներ ունի: Ես վստահ եմ, որ նա կզարմանա»,-ասաց պատգամավորը: Նա նշեց, որ առայժմ հայտնի չէ՝ Քիմ Քարդաշյանը Գյումրի գնալու է, թե ոչ, բայց վստահ է, որ նրա այցը միայն Երեւանով չի սահմանափակվելու:

Կդիմավորի՞ Լեւոն Մարտիրոսյանը Քիմ Քարդաշյանին օդանավակայանում, թե՞ ոչ, պատգամավորը փակագծեր չբացեց՝ նշելով, որ դիմավորումը եւ ճանապարհելը կազմակերպված է: «Ասում են՝ նոր մարզպետներ են փոխելու, եթե թափուր տեղեր ազատվի, Քարդաշյանն այդ ընթացքում այստեղ լինի, միգուցե հավակնի ինչ-որ պաշտոնի, դե մարզպետի, որովհետեւ փոխմարզպետի չի համաձայնի»,-կատակեց Լեւոն Մարտիրոսյանը: Ի դեպ, սա նրա առաջին կատակը չէ ամերիկյան հեռուստաստղի մասին, ժամանակին նա  Քիմ Քարդաշյանին առաջարկել էր ԲՀԿ ղեկավարի պաշտոնը, սակայն կուսակցությունը ուրիշ որոշում էր կայացրել: «Քարդաշյանը լավ ղեկավար կլիներ, եթե ինքը ղեկավարեր ԲՀԿ-ն,  եւ ես, եւ բազմաթիվ քաղաքական գործիչներ կանդամակցեինք, բայց իրենք իրենց որոշումը կայացրեցին: Այդտեղից էլ սկսվել է մեր կապը, ուրիշ կապ դեռ չկա, պատրաստվում եմ ակտիվ մասնակցել իր այցին»,-ասաց  պատգամավորը: