ՀՀԿ-ական Գագիկ Մելիքյանի փեսայի դեմ կրակոցների գործը մոտեցել է իր տրամաբանական ավարտին.

«Ժողովուրդ» թերթը գրում է. «Շուրջ մեկ տարի շարունակ Ավան և Նոր Նորք վարչական շրջանների ընդհանուր իրավասության դատարանում քննվում էր ԱԺ ՀՀԿ խմբակցության քարտուղար Գագիկ Մելիքյանի փեսայի` Անուշավան Մանուչարյանի դեմ կրակոցների գործը, որը երեկ մոտեցավ իր տրամաբանական ավարտին: ՀՀԿ-ական փեսայի դեմ կրակոցներ արձակած անձինք դատապարտվեցին 6 տարի ազատազրկման:

Դեռևս 2013թ. մայիսի 23-ին՝ ժամը 15:30-ի սահմաններում, Երևանի Հարավ-արևմտյան թաղամասի բնակիչ, 39-ամյա Արմեն Սիմոնյանը, ով Բերդի քաղաքապետ Հարություն Մանուչարյանի քրոջ տղան է, այցելության էր գնացել իր եղբոր տուն: Նրա հետ էր եղել նաև Բերդի քաղաքապետի որդին` Անուշավան Մանուչարյանը: Տղաները բակում կանգնած էին եղել, երբ նրանց ուղղությամբ հնչել էին կրակոցներ: Ուշագրավ է, որ կրակոցներից հետո էլ, չնայած քաղաքապետի որդին փախել էր, կրակողներից մեկը հետապնդել էր Անուշավան Մանուչարյանին մինչև այն պահը, երբ վերջինս մտել էր շենքի շքամուտք:

Ինչպես հետագայում պարզվել էր` կրակոցների հեղինակներն էին Երևան քաղաքի Քանաքեռ-Զեյթուն վարչական շրջանի բնակիչներ 25-ամյա Բեգլար Հովհաննիսյանն ու 30-ամյա Հրանտ Հարությունյանը: Դեռևս այն ժամանակ շատերին զարմանալի էր թվացել, թե որն է պատճառը, որ կրակողը մինչև վերջ հետապնդել էր քաղաքապետի որդուն և ամեն գնով ցանկացել սպանել, եթե, ինչպես փորձում էին վստահեցնել Բերդի քաղաքապետն ու ՀՀԿ խմբակցության քարտուղարը, կատարվածը շփոթմունք է եղել: Մի՞թե շփոթմունքն այդքան «հաստատուն» է եղել, որ հարձակվողներն իրենց «թիրախին» հետապնդել են ընդհուպ մինչև շքամուտք:

Մանրամասները՝ թերթի այսօրվա համարում։