ՀՀԿ-ական պատգամավորը ևս միանում է գյումրեցիների արդար պահանջին.

«Ժամանակ» թերթը զրուցել է ԱԺ Հանրապետական խմբակցության պատգամավոր Արման Սահակյանի հետ: Ներկայացնում ենք հատված հարցազրույցից.

«Պարոն Սահակյան, Ձեր կարծիքով՝ Գյումրիում տեղի ունեցած սպանդին որքանո՞վ ադեկվատ արձագանքեց իշխանությունը եւ ի՞նչ պետք է անի հիմա՝ Գյումրիում տիրող լիցքերը մեղմելու համար:

Գյումրիում տեղի ունեցածը շատ մեծ ողբերգություն է: Ժողովրդի բողոքն ու ցասումը լիովին բնական եմ գնահատում: Պետք չէ այստեղ սեւ ուժեր փնտրել: Իրականում սպանդի է ենթարկվել քնած ընտանիք, ու ժողովրդի ցասումը բնական է: Գյումրիի ժողովուրդը լրիվ պահանջատեր է, եւ այդ պահանջը հասկանալի է: Այս պարագայում իշխանությունն ինչ էլ աներ, կարծում եմ՝ նույն արդյունքն էր լինելու: Ժողովրդի պահանջն այս պահին ուղղված է Ռուսաստանի իշխանություններին, որպեսզի քաղաքական որոշում կայացնեն՝ այդ հանցագործին Հայաստանի իշխանություններին հանձնելու: Բնականաբար, մարդիկ օրենքներն այդքան լավ ո՛չ հասկանում են, ո՛չ էլ պարտավոր են հասկանալ: Նրանց համար մեկ են պայմանագրի ինչ-որ կետերի հետ կապված բացատրությունները: Դա է խնդիրը, եւ կարծում եմ՝ Ռուսաստանի իշխանությունները ճիշտ կգնահատեն եւ քաղաքական որոշում կկայացնեն:

Այսինքն՝ Դուք միանո՞ւմ եք հասարակությանը, որի պահանջն է՝ հանցագործին հանձնել Հայաստանի իրավապահ մարմիններին եւ ամբողջական հետաքննությունն անցկացվի այստեղ:

Իշխանությունները՝ դատախազի գլխավորությամբ, ամեն դեպքում ամեն քայլ անում են, որպեսզի ընդգրկված լինեն բոլոր պրոցեսների մեջ, եւ, բնականաբար, միանում եմ: Այնպես չէ, որ չեմ եղել եւ նոր եմ միանում: Դա բնական պահանջ է: Սա Գյումրիի եւ ՀՀ ողջ բնակչության ողբերգությունն է, ռուսներն էլ պետք է լսեն ու հասկանան այդ պահանջը»:

Մանրամասները՝ թերթի այսօրվա համարում: