ՀՀԿ-ականը համագործակցության մասին. «Ի՞նչ է` մենք թշնամինե՞ր ենք»

«Ո՞վ է ասում՝ չի ստացվում, լավ էլ ստացվում է»,- ասում է ՀՀԿ պատգամավոր Համլետ Հարությունյանը՝ անդրադառնալով ընդդիմություն-իշխանություն հնարավոր համագործակցությանը։

Վարչապետի առաջարկով ԱԺ նախագահը հանդիպել էր բոլոր խմբակցությունների ներկայացուցիչների հետ` քննարկելու 12 կետանոց պահանջները: ՀԱԿ-ը հրաժարվել էր մասնակցել հանդիպմանը, իսկ ԲՀԿ-ն եւ «Ժառանգությունը»` մերժել էին որեւիցե առաջարկ։ Իշխանությունները չեն կորցրել հույսը.

«Ո՞վ է ասում, որ առաջին իսկ հանդիպումից պետք է ընդհանուր հայտարարի գան: Ինձ թվում է՝ կստացվի, ի՞նչ է` մենք թշնամինե՞ր ենք»,- նշում է ՀՀԿ պատգամավորը

Համլետ Հարությունյանի կարծիքով` ոչ իշխանական եռյակը 12 կետը պետք է ոչ թե վերջնագիր, այլ որպես փոխզիջում ներկայացնի, քանի որ հնարավոր է, որ ոչ բոլոր կետերն են համապատասխանում ժողովրդի շահերին.«160 հազար միայն ՀՀԿ անդամ կա, որեւէ մեկը դրա տակ ստորագրել է, այդ ի՞նչ է` նրանք ժողովո՞ւրդ չեն»:

ՕԵԿ-ը, թեեւ 12 կետերի հեղինակներից չէ, սակայն մասնակցել է ԱԺ նախագահի մոտ տեղի ունեցած հանդիպմանը: Խմբակցության ղեկավար Հեղինե Բիշարյանը համամիտ է եռյակի հետ` բանակցություններն անիմաստ են. «Եթե կառավարությունը ցանկանում է համագործակցել կոնկրետ որեւէ քաղաքական ուժի հետ, առավելեւս ՕԵԿ-ի հետ, նշանակում է` մեր օրենսդրական նախաձեռնությունները պետք է լինեն լավագույն կամուրջը, թիրախը, որպեսզի մենք համագործակցենք»։ Իշխանությունները եւ մասնավորապես պատգամավոր Համլետ Հարությունյանը, հանգիստ է վերաբերում նման հայտարարություններին. «Քաղաքական դաշտում ավելի շատ քաղաքական բիզնեսմեններ կան, այլ ոչ թե քաղաքական կուսակցություններ»։