ՀՀԿ-ն դեմ է եռյակի՝ ԸՕ-ն փոխելու վերաբերյալ որոշման նախագծին.

«Հրապարակ» թերթը գրում է. «Մինչ Սերժ Սարգսյանի և իշխանության ազնվությունն ստուգելու վերաբերյալ ոչ իշխանական եռյակի առաջարկած «ստուգողական թեստը»՝ ԸՕ-ն փոխելու մասին, շարունակում է մնալ անարձագանք, իշխանությունը, հավանաբար, ժամանակ է փորձում շահել, այդուհանդերձ, եռյակը հաջորդ քայլն է կատարում: Երեկ Լևոն Զուրաբյանը հայտնել է, որ մտադիր են արտահերթ նիստ հրավիրել նույն թեմայով, որ 12 կետանոց պահանջագրի 10-րդ կետն է: Հիշեցնենք, որ անցած շաբաթ Սերժ Սարգսյանը հայտարարեց, որ կառավարությանը հանձնարարել է ևս մեկ անգամ անդրադառնալ ոչ իշխանական ուժերի ներկայացրած 12 կետանոց պահանջներին: Եռյակի մեկ օր անց նիստից հետո Ռուբեն Հակոբյանը հայտարարեց, թե եռյակը քննարկումներ կսկսի իշխանությունների հետ, եթե նրանք անմիջապես կատարեն 12 պահանջներից կոնկրետ 10-րդ կետը և բարեփոխեն Ընտրական օրենսգիրքը՝ անցում կատարելով 100 տոկոս համամասնական ընտրակարգին և ամրագրելով ընտրացուցակների հրապարակումը: Եռյակի ներկայացուցիչները հայտարարեցին, որ իրենք քննարկելու բան չունեն, եթե կատարված չէ իրենց առաջ քաշած նախապայմանը: Կա՞ իշխանության օրակարգում ԸՕ-ն փոխելու և հատկապես եռյակի առաջարկած փոփոխություններն անելու մտադրություն, երեկ զրուցեցինք ԱԺ պետաիրավական հարցերի հանձնաժողովի նախագահ, ՀՀԿ-ական պատգամավոր Հովհաննես Սահակյանի հետ:

- Իշխանության ներկայացուցիչները տարբեր առիթներով հայտարարել են, որ մտադիր են վերափոխել ԸՕ-ն, ի վերջո, եթե այդպես է, ի՞նչն է խանգարում դա անել հիմա՝ բավարարելով նաև եռյակի առաջ քաշած նախապայմանը և ապացուցելով իշխանության ազնվությունը:

- Վստահության և հավատի մասին եռյակը չէ, որ պետք է խոսի, որովհետև եթե սկսենք 12 կետերից և վերջացնենք այսօրվա պահանջներով, ապա կտեսնենք, որ այս կարճ ժամանակամիջոցում բավականին փոփոխություններ են տեղի ունեցել իրենց պահանջների և փոփոխությունների մեջ: Սա՝ իմիջիայլոց: Ինչ վերաբերում է ԸՕ-ի փոփոխությանը, այո, մենք բազմիցս ասել ենք և այսօր էլ պնդում ենք: Ես, որպես պետաիրավական հանձնաժողովի նախագահ, տեղյակ եմ այդ գործընթացին, որի էությունը կայանում է հետևյալում: Սովորաբար ԸՕ-ն վերանայում կամ բարեփոխում են ընտրություններից առնվազն մեկ տարի առաջ, այս պահանջը նաև դնում են միջազգային կառույցները, հետևաբար, արհեստական աղմուկ կամ խնդիրներ բարձրացնելու անհրաժեշտություն այստեղ չկա: Ասեմ ավելին. եթե մենք ուզում ենք այդ ամենը խորքային փոխել՝ թե ընտրական համակարգ, թե պատկերացումներ, թե համակարգային փոփոխություններ, ապա դա կարող է լինել բացառապես սահմանադրական բարեփոխումների ճանապարհով:

- Իրենք դեմ են այդ փոփոխություններին, և դրա համար էլ ստեղծվել է այս վիճակը: Բացի դրանից, ձեր խմբակցության ղեկավարը մեզ հետ զրույցում հայտնել է, որ արդարադատության նախարարությունում այս հարցերով աշխատանքային խումբ է ձևավորվել, և մարտ-ապրիլ ամիսներին, հավանաբար, ԸՕ-ն փոփոխելու աշխատանքներ կծավալվեն: Անհասկանալի է՝ եթե իշխանության օրակարգում արդեն իսկ կա նման մտադրություն, ի՞նչն է խանգարում օր առաջ հարցը լուծել և չձգել մինչև հաջորդ ընտրություններ:

- Եկեք փաստերով խոսենք, տեսեք, իրենք հարցը և 12 կետերում են ընդգրկել, և այս մասին անհետաձգելի կարգով և արտահերթ ռեժիմով որոշման նախագիծ մտցրել ԱԺ (նախագիծը, հավանաբար, կլսվի դեկտեմբերի սկզբին հրավիրելիք արտահերթ նիստի ընթացքում), իսկ այսօր այդ պահանջը դնում են քաղաքական առումով և ասում՝ եկեք փոխեք ընտրական համակարգը, որ վստահություն առաջանա: Այսինքն՝ տարբեր մեթոդներով և ժամանակներում այդ խնդիրը կարծես թե դարձնում են քննարկման առարկա: Իսկ մենք ասում ենք՝ գիտեք ինչ, եթե այս ամենը ձեզ համար ընդամենը քաղաքական շահարկումների առիթ է, մեզ համար պատասխանատվություն է: Որովհետև ընտրական համակարգի կայունությունը, թափանցիկությունը, ավելի ընկալելի լինելը պետության պարտականությունների և պարտավորությունների մեջ է մտնում: Իհարկե, կարելի է այդ փոփոխություններն ԸՕ-ում հպանցիկ անել ու անցնել առաջ՝ առանց մտածելու հետևանքների մասին, բայց եթե մի փոքր խորը վերլուծություն անենք և մտածենք, էսօրվա քաղաքական համակարգի պայմաններում նայենք հարցը, վերցնենք ու ընտրական համակարգը փոխենք 100 տոկոս համամասնական, կտեսնենք, թե ինչպիսի խնդիրներ կառաջանան: Եվ վերջապես, իսկ ո՞վ է ասել, որ 100 տոկոս համամասնականը դա ամենալավ ընտրակարգն է, որևիցե մեկը չի կարող պնդել, որ դա ավելի լավն է, քան այսօրվա համակարգը, կամ 100 տոկոս մեծամասնական, կամ էլ խառը ընտրակարգը: Մենք մշտապես ենք ասել, որ ինքներս կողմնակից ենք աստիճանաբար գնալու այդ ուղղությամբ, և դրա մասին են վկայում փաստերը, որ հենց մեր նախաձեռնությամբ մեծամասնականով ընտրված պատգամավորների տեղը կրճատվեց, և փոխարենը ավելացվեցին համամասնական մանդատները:

- Եթե պարզ ասեք՝ իշխանության համար ընդունելի չե՞ն եռյակի առաջարկները՝ 100 տոկոս համամասնական ընտրակարգին անցնելու և ընտրացուցակները հրապարակելու վերաբերյալ:

- Քանի որ որպես պատգամավոր ես իմ վրա որոշակի պատասխանատվություն եմ կրում, այսօր միանշանակ չենք կարող ասել, որ կողմ ենք կամ դեմ ամբողջովին համամասնական ընտրակարգին անցնելու փաստին: Դա ասելու համար պետք է լուրջ քննարկում և վերլուծություն անել, միայն մեծամասնական տեղերը վերացնելը չէ խնդիրը, դա բավականին լուրջ գործընթաց է:

- Եռյակն ասում է, որ դա ամենաարագ լուծվող հարցն է, նույնիսկ ժամերի ընթացքում կարելի է լուծում տալ, քանի որ այս տարիներին շատ է քննարկվել, միջազգային կազմակերպությունները նույնպես իրենց տեսակետն են հայտնել:

- Մենք էլ ասում ենք, որպեսզի դա ավելի արժանահավատ լինի և ունենա երաշխիքներ, որ ինքն ավելի ճիշտ մեխանիզմների տակ կիրառվի, եկեք նստենք քննարկենք, սահմանադրական բարեփոխումների խնդիրը քննարկենք և կտեսնենք, որ այստեղ էլ կան բազում ընտրական խնդիրներ, որոնք պետք է կարգավորվեն հենց սահմանադրությամբ:

Մանրամասները՝ թեթրի այսօրվա համարում