ՀՀԿ-ում հենց նման մարդիկ պետք է լինեն. Վարդան Ղուկասյանը՝ Մարտուն Գրիգորյանի մասին

Սահմանադրական փոփոխությունների քննարկումներից արդեն ուրվագծվում է, որ իշխանությունը հակված է ամբողջությամբ համամասնական ընտրակարգին: Անկախ պատգամավորները վաղուց էին մտահոգութուն հայտնում, որ այդ փոփոխությամբ իրենք դուրս կմնան պայքարից և ստիպված են լինելու մտնել որևէ կուսակցություն: Որոշ ԲՀԿ-ականներ մտածում են՝ էշ նստելը մի այիբ է, իջնելը՝ երկու, և գերադասում են այլ կառույցներում բարեխոսել, քան վերադառնալ ԲՀԿ:

«Ժամանակ»-ի թղթակիցը նախկին ԲՀԿ-ական Մարտուն Գրիգորյանից հետաքրքրվել է, թե ինչ մտադրություն ունի այդ կապակցությամբ, ինչպես է ապահովելու 2017-ին իր վերադարձը խորհրդարան: Պատգամավորը պնդել է, որ ինքը նախկին կարծիքին է՝ կողմ է համամասնական ընտրակարգին, չնայած արդեն կուսակցական չէ:

«Երբ որ եկավ փոփոխությունների ժամանակը, ընտրությունների ժամանակը, ես իմ դիրքորոշումը կհայտնեմ, երկու տարի դեռ կա»,-ասել է պատգամավորը՝ հավելելով թե եթե դուրս է եկել ԲՀԿ-ից, դա դեռ չի նշանակում որ իր դիրքորոշումը փոխել է:

Թերթի դիտարկմանը, թե հնարավո՞ր է ՀՀԿ-ի ցուցակով մտնի ԱԺ, պատասխանել է. «Եթե ժողովուրդը գտնի, որ Հանրապետական ցուցակով պիտի լինեմ ու իրենց համար ինչ-որ բան հնարավորություն ունենամ անելու, էն ժամանակ կորոշենք»:

Գյումրեցի պատգամավորի քաղաքական ապագային հատկապես խանդով է վերաբերվում Վարդան Ղուկասյանը, ով «Ժամանակ»-ի հետ զրույցում անդրադառնալով Գրիգորյանի ճամբարափոխության հավանականությանը՝ ասել է. «Ամեն մարդ իր արյան կանչով է ապրում, թելադրվում: Եթե ՀՀԿ-ն գտնում է, կանչում է իր շարքերը, թող գնա, ի՞նչ է եղել որ: Ժողովուրդն այդ ժամանակ իր գնահատականը կտա: ՀՀԿ-ում պետք է հենց նմանատիպ մարդիկ լինեն, ինչ է պատահել որ»: