Հիմա արդեն կարող եմ գաղտնազերծել,այդ երկուսը`Շարմազանովն ու Աշոտյանն էին...

Հունիսի 12-ը ՀՀ նախկին վարչապետ Անդրանիկ Մարգարյանի ծննդյան տարդարձն է: Այսօր նա կդառնար 63 տարեկան: Երջանկահիշատակ վարչապետի կատարած աշխատանքի եւ նրա հետ կապված հետաքիքիր հիշողություններով եւ պատմություններով, Fnews.am-ի հետ կիսվեցին ԱԺ պատգամավորները:

ԱԺ ՀՀԿ խմբակցության պատգամավոր Հովհաննես Սահակյանը պատմեց.<<Անդրանիկ Մարգարյանի հետ ցանկացած հանդիպում, կարող էր հաճելի մի հուշ դառնար: Հիշում եմ, երբ 2006 թվականին նա այցով եկավ Սպիտակ՝ բավական ջերմ ու մտերմիկ մթնոլորտ ստեղծվեց, նա ծանոթանալով մարդկանց խնդիրներին, պահանջներին: Հանդիպման ընթացքում նա հայացքով հասկացրեց, որ այցելելու ենք Սարամեջ: Սարամեջ գյուղական համայնքում մարդիկ ասում էին սա Անդրանիկ Մարգարյանի գյուղն է, որովհետեւ նա այդ գյուղում բավական մեծ աշխատանք էր կատարել: Անվտանգության աշխատակիցները եւ մնացածները մնացին տեղում, իսկ մենք գնացինք այդ գյուղը: Գնացինք, նստեցինք եւ բոլորը հավաքվեցին, տոնական մի միջոցառում ստացվեց: Մենք մնացինք մինչեւ կեսգիշեր եւ հենց այդտեղ էր, որ վարչապետը խոստացավ Սարամեջ համայնքի ջեռուցման համակարգը վերականգնել: Պետք է նաեւ նշեմ, որ Սարամեջն այն բացառիկ գյուղերից էր, որն այդ ժամանակ ուներ ամենամոդեռն խաղահրապարակը: Մի պատմություն եւս հիշեցի այս պահին, 2006 թվականն էր, երբ հավաքված էինք մեր կուսակցության գրասենյակում, պատգամավորական ցուցակներն էինք ճշտու, վարչապետը կանգնեց եւ ասաց այն երկուսը շատախոս են նրանց տանելու եմ Ազգային ժողով, իսկ ինձ ասեց դու գործի մարդ ես, քեզ տանելու եմ կառավարություն: Հիմա արդեն կարող եմ գաղտնազերծել, այդ երկուսն էին` Շարմազանովն ու Աշոտյանը>>:

Լավ հիշողություններից բացի, ԱԺ ՀՀԿ խմբակցության մեկ այլ պատգամավոր՝ Խոսրով Հարությունյանի հետ խոսեցինք նաեւ Անդրանիկ Մարգարյանի քաղաքական գործիչ տեսակի մասին. <<Ըստ էության, հոկտեմբերյան ոճրագործությունից հետո, քաղաքական խորը ճգնաժամի պայմաններում նրանից պահանջվում էր եւ շրջահայացություն եւ քաղաքական համագործկացության մեծ ձիրք, կոմպրոմիսների գնալու կարողություն, հանդուրժողականություն: Պետք է ասել, որ նրա մոտ դա ստացվեց: Նրա երկարակեցության հիմնական գրավականը քաղաքական օպոնենտների հետ համագործակցելն էր: Հարկ է նկատել, որ Հոկտեմբերի 27-ից հետո, լարված ներքաղաքական ճգնաժամը նրան հաջողվեց երկու տարվա ընթացքում աստիճանաբար մեղմել: Այս կոնտեքստում նաեւ պետք է ճիշտ գնահատել Ռոբերտ Քոչարյան-Անդրանիկ Մարգարյան համագործակցությունը: Մարգարյանի կառավարման տարիները գրանցվեցին, որպես տնտեսական հաջողությունների վերելքի տարիներ, իհարկե, սա բացառապես կառավարությանը վերագրել չի կարելի: Մենք ոչ միայն տնտեսության աճ նկատեցինք, այլ նաեւ արտագաղթի զրոյացում, անգամ 2004 թվականին ունեցել ենք 12 հազար ներգաղթ: Կարծում եմ, այս քայլերով նա նորագույն պատմության մեջ կմնա որպես քաղաքական երկխոսությունը կարեւորող, օպոնենտների հետ համագործակցող այր>>:

Այն հարցին, թե արդյո՞ք այսօրվա Հայաստանն Անդրանիկ Մարգարյանի երազած Հայաստանն է, պատգամավորը պատասխանեց. <<Նախ չեմ կարծում, որ Անդրանիկ Մարգարյանի մի քանի տարվա վարչապետությունը կարող էր նրան բերել բաղձալի ու երազած Հայաստանին: Ամեն մեկը յուրովի է երազում, իսկ թե նա ինչպիսի Հայաստանի մասին էր երազում, դա իրենից պետք էր հարցնել: Երազելի Հայաստանն այն է, երբ մարդիկ արժանապատիվ ապրելու հնարավորություն են ունենում: Պետք չէ մոռանալ, որ վարչապետը ներկայացնում էր ՀՀԿ կուսակցությունը>>:

Սոսե   Չանդոյան