Հիմա ո՞ւր են իմ կուտակային գումարները, ո՞վ է դրանց վրա փող աշխատում

Անցած տարի, երբ կուտակային կենսաթոշակի շուրջ քննարկումների ժամանակ պնդում էի, որ մենք կարիք ունենք նոր համակարգի, որ եղածով առաջ գնալ չի լինի, որ կուտակայինը լավ լուծում կլինի և այլն, հայտնվել էի հոսանքին հակառակ ուղղությամբ:

Հիմա պետք է ցավոք խոստովանեմ, որ իմ բոլոր ընդդիմախոսներն ունեն շատ հստակ փաստեր, որոնցով կարող են հիմնավորել, որ առնվազն մինչև հիմա ես սխալ եմ եղել: Ու դրա պատճառը ոչ թե կուտակային համակարգի վատը լինելն է (հիմա էլ եմ պնդում, որ կուտակայինն անհրաժեշտ է), այլ մեր պետական ինստիտուտների փնթի, անպատասխանատու աշխատանքն է:

Նախորդ տարվա իմ հաշիվների մասին հաշվետվությունից պարզվում է, որ ընդամենը 3 ամսվա գումար է փոխանցված կուտակային հաշվիս, այն դեպքում, որ երկու տեղ եմ գրանցված որպես աշխատող, ու երկու տեղից էլ գործատուները վստահեցնում են, որ փոխանցել են ամբողջը: Ու նույն վիճակը մյուս ծանոթներիս մոտ է:

Փաստորեն, ՀՀ ՊԵԿ Հարկային ծառայության ու Կենտրոնական դեպոզիտարիայի (թող իրենց մեջ որոշեն՝ ով ավելի մեծ մեղքի բաժին ունի) անհետևողական, անպատասխանատու աշխատանքի հետևանքով մի ողջ համակարգի նկատմամբ վստահությունը կասկածի տակ է դրվում: Եթե կուտակային համակարգը հենց առաջին տարում նման կոպիտ սխալներ է թույլ տալիս, ինչո՞վ ենք ապահովագրված ապագայում դրանց կրկնությունից:

Բարոյական վնասը դեռ մի կողմ, ես դեռ պատրաստ եմ բանավիճել ու հիմնավորել, որ կուտակային համակարգը կարևոր բարեփոխում է: Բայց ինձ անհատապես հասցվել է նյութական կոնկրետ վնաս, հասկանում ե՞ք, մեր պետական ինստիտուտներն ինձ նյութական վնաս են հասցրել հստակ՝ չափելի գումարի տեսքով:

Հիմա ո՞ւր են իմ կուտակային գումարները, ո՞վ է դրանց վրա փող աշխատում, ինչո՞ւ անցած տարվա ընթացքում իմ գումարներն աշխատել են ոչ թե իմ, այլ չես հասկանում ում օգտին: Ո՞վ պետք է պատասխանատվության ենթարկվի։

Գոռ Ծառուկյան