Հին Էրիվանի Մանվելը ևս միացավ խեղկատակների ակումբին

Հերիք չի ականատես էինք լինում Ցեղասպանույթան 100-ամյակին նվիրված տարատեսակ էժան միջոցառումների ու խեղկատակությունների, հիմա էլ համացանցում տարածվում են անցյալ տարվա`Ցեղասպանության 99 ամյակին նվիրված «շոուների» նկարները:
Աչքովս ընկավ, թե ինչ ջանասիրությամբ են տարածում փայլփլուն կոստյումով, 2 օրվա արդուկված փողկապով մի կիսաօլիգարխի` Հին Էրիվան հոլդինգի սեփականատեր Մանվել Տեր Առաքելյանի «հայրենանվեր» գործը. Անցյալ տարի, գործարարը ինչ-որ էժան շոուներ էր կազմակերպել Ծիծեռնակաբերդում, երգ ու պար էին բռնել Ազատության հրապարակում: Մի խոսքով Տեր Առաքելյանը մի փոքր «ռեստորանային» կոլորիտ էր հաղորդել ապրիլի 24-ին, ինքնատիպությունը պահպանելու նպատակով (Համացանցում տարածում էին նկարները «Հին Էրիվան Ավելին քան ռեստորան» և այլ լոզունգներով): Հատկանշական է, որ Մանվելի` «Կիմ Չեն Ըն» դեմք արած զավեշտալի ֆոտոները տարածվում են Հին Էրիվանի ֆեյսբուքյան պաշտոնական էջով:
Այսինքն ինչ ենք ստացել մենք այսօր: Հայ ազգի «աշխույժ» բիզնեսմենները, «էմոցիոնալ» կիսաօլիգարխներն ու «հնարամիտ» գործարարները ամեն հարմար առիթ օգտագործում են բիզնեսներին զարկ տալու համար. Մեկը ենթադրենք ունի անձեռոցիկի արտադրություն, նա անմիջապես մտածում է, թե անմոռուկը, արտադրվող անձեռոցիկների ներսի մասից պակցնել թե՞ դրսի: Մյուսը իր սուպերմարկետների ցանցը, բառիս բուն իմաստով զարդարում է անմոռուկներով: Դե իսկ մյուս կիսաօլիգարխն էլ ունի ռեստորանային համալիր, կազմակերպում է տոնախմբություններ ու տարատեսակ շոուներ, ռեստորանային խանդավառություն նվիրված Ցեղասպանության 100-ամյակին ` վերածելով այն կլոունադայի:
Կառաջարկեմ ադի-բուդի էլ արտադրել անմոռուկի գույնի. ապրիլի 23-ի երթի ժամանակ բավականին լավ սպառում կունենա:
Հին Էրիվանի արկածախնդիր կիսաօլիգարխ երիտասարդին փոխանցեք, որ ժամանակն է կողմնորոշվել թե, ի՞նչ գործունեություն է ուզում ծավալալ`լինել գործարար, քաղաքական գործիչ, թե՞ հետապնդման մեջ գտնվող քաղաքացիական ակտիվիստ:
Պետք չէ այսչափ արժեզրկել զոհերի հիշատակը…

Անի Սանոսյան