«Հլը որ մեր հասարակությունը մի քիչ թերզարգացած է այսպես ասած սեփական շահերը պաշտպանելու համար»

Այսօր Դիլիջանում առաջին անգամ մեկնարկել է Բիզնես Ինովացիոն ֆորումը, որից հետո լրագրողների հետ զրուցել է Ինֆորմացիոն Տեխնոլոգիաների Ձեռնարկությունների Միության գորադիր տնօրեն Կարեն Վարդանյանը

Նրանից լրագրողները փորձել են հետաքրքրվել, թե ինչ կարծիքի է Կառավարության ձեռնարկած կենսաթոշակային բարեփոխումների մասին, նկատի ունելով, որ այդ ոլորտի բազմաթիվ աշխատակիցներ դժգոհում էին այդ օրենքից:

<<Մենք հիմա պետք է որոշակի առաջարկություններ անենք, փոխենք այդ կենսաթոշակային ռեֆորմի սցենարները: Կարծում եմ, որ հիմնական խնդիրը կենսաթոշակային ռեֆորմներում,դա վստահությունն է: Բոլոր կետերը ինչ որ այստեղ անում ենք՝ պետք է հիմնված լինեն վստահության վրա: Այդ վստահությունը ինչպես կարելի է ստեղծել կամ վերականգնել: Առաջին խնդիրն այն է, որ կարծում ենք, որ որևէ կոպեկ այդ  գումարից Հայաստանից պետք է   դուրս չգա: Երկրորդ՝ մենք կարծում ենք, որ ամբողջ գումարը պետք է ներդրվի արտադրական ոլորտ: Ես կարծում եմ, որ մեր ջանքերը կբերեն նրան, որ այդ բարեփոխումները կհետաձգվեն այնքան ժամանակ, մինչև որ իմ ասած խնդիրները չլուծվեն: Մասնավորապես գումարները պետք է ուղղվեն  արտադրական ոլորտ, շատ հստակ ներդրումային ծրագրեր նախապատրաստվեն, իսկ  այդ կենսաթոշակային գումարները պետք է գնան ատոմակայան, կարող են գնալ էլեկտրացանցեր, կարող են գնալ Հայաստանի մասնաբաժինը  Հայռուսգազարդին, կարող են գնալ ՋԷԿ-եր, կարող են գեներացվել այսօր դուք լսեցիք, որ ՏՏ ոլորտի զարգացումը միանշանակ կախված է կադրերի առկայությունից, ինչքան կադրեր լինեն, այնքան ոլորտը  կաճի, և այդ ոլորտը աճում է 22 տոկոսով: Եվ տրամաբանական է, որ այդ գումարները ուղղվեն կրթական ոլորտ: Եվ կարծում եմ կառավարությունը պետք  ինքը գեներացնի պատրաստի նմանատիպ ծրագրեր, որտեղ այդ գումարները գնան այդ ծրագրերի մեջ>>,- ասել է Կարեն Վարդանյանը:

Խոսելով  կառավարիչ  ընկերությունների մասին, նա ասել է, որ դրանք  կամ պետք է հաշվետու լինեն կառավարությանը, կամ պետք է մասնավոր չլինեն: Վարդանյանը  կարծում է, որ այդ կոմպոնենտը ներկայիս բարեփոխումներում հաշվի չեն առել, ինչն էլ  որ  բերել է  այդ բողոքի ալիքին:

<<Եթե մարդը բարձր աշխատավարձ է ստանում, ինքը ըստ էության մուծում է մինչև   տասնմեկ տոկոս, սա չի կարող այդպես լինել: Ու այդ արդարության պահերը, վստահության պահերը, ես կարծում եմ ամենակարևորն է: Երկկողմանի է ցանկացած պրոցես , երբ ասում ենք այդ մարդիկ ֆինանսական հարված են ստանում, այդ մարդիկ Գերմանիայում իրենց շահերը պաշտպանելու ձև գիտեն և այդ ձևը արհմիությունն է: Ես կարծում եմ, որ ՏՏ ոլորտի երիտասարդները պետք է ստեղծեն իրենց արհմիությունը: Սա առաջին և վերջին խնդիրը չի: Նման խնդիրներ անընդհատ առաջանալու են և պլանավորված, մասնագիտորեն պաշտպանեն իրենց շահերը: Հլը որ  մեր հասարակությունը այդ առումով մի քիչ թերզարգացած է այսպես ասած սեփական  շահերը պաշտպանելու համար>>,- ասել է Կարեն Վարդանյանը:

Լիլիթ Թադևոսյան