Հնարավոր է փոփոխվի «Երրորդմասցի Լյովիկի» սպանության գործով մեղադրյալների կարգավիճակը

«Երրորդմասցի Լյովիկի սպանության գործի քննությունը տեղում դոփում է»,-Fnews.am-ի հետ զրույցում ասաց գործով մեղադրյալ Վահան Հակոբյանի փաստաբան Երվանդ Վարոսյանը: Նրանից փորձեցինք պարզել, թե գործն ինչ ընթացքի մեջ է.«նախաքննությունը շարունակվում է, որևէ նոր բան ասել չեմ կարող, քանի որ տեղեկություն նախաքննական մարմնից չեմ ստացել»: Պաշտպանը միայն տեղեկացրեց, որ մեղադրյալների կալանքի փոփոխության ժամկետը լրանալու է մի քանի օրից: «Հնարավոր ինչ որ բան փոխվի, բայց որևէ բան այս փուլում չեմ կարող կանխատեսել»,-ասաց պաշտպանը:

Հիշեցնենք, որ մարտի 4-ին «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել էին 1 զոհի եւ 2 վիրավորի, վիրավորներին տեղափոխել են «Էրեբունի» ԲԿ, ճանապարհին նրանք մահացել էին։ Կրակոցների հետևանքով մահացած երեք անձանցից մեկը Լեւոն Ղազարյանն էր, որը հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադևոսյանն է, հայտնի՝ «Դերո» անունով, երրորդը՝ Մեսրոպ Նազարյանցը, մահացել է տեղում՝ ՔԿՀ-ի ավտոկայանատեղիում, որտեղ տեղի էր ունեցել դեպքը։Քրեական գործ էր հարուցվել ՔՕ 104 հոդվածի 2-րդ մասին 1-ին կետով եւ 235 հոդվածի 1-ին մասով: Գործով մեղադրյալներից այս պահին կալանավորված են Սարգիս Գրիգորյանը (Ծգլ), Սարգիս Հախանումյանի (Տլե) և Վահան Հակոբյանը (Գաստիկ), որոնք չեն ընդունում մեղադրանքը և ցուցմունք էլ չեն տալիս: Կալանավորված էին ևս 5 անձ, որոնք այժմ ստորագրությամբ ազատ են արձակվել: Նրանց փաստաբան Լևոն Ղազարյանը նույնպես տեղեկացրեց, որ գործով որեւէ նորություն չկա, իր պաշտպանյալին ու ստորագրությամբ ազատված մյուս մեղադրյալներին չեն կանչել նախաքննական մարմնից: