Հորդառատ անձրևները Լոռու մարզում մեծ վնասներ են հասցրել

Հորդառատ անձրևների հետևանքով Լոռու մարզի Գուգարք համայնքի  բնակչուհի Աստղիկ մայրիկի կարտոֆիլի հորն արդեն ավելի շատ ջրհոր է հիշեցնում: Տիկին Աստղիկն իր աղջկա և թոռների հետ ապրում է գյուղի ծայրում, այնպես որ չընդմիջվող անձրևները` վերածվելով ջրհեղեղի, հոսել ու հանգրվանել են նրա տանը: 

«էս մի ամիս ա էս վիճակն ա»,-Fnews.am-ի հետ զրույցում ասում է Աստղիկ մայրիկն ու ցույց տալիս ջրով լցված կարտոֆիլի հորը: «Ինչ էս սելավներն սկսել ա, էս ջուրը եկել, լցվել ա, սենց ապրել կլինի՞»,-սրտնեղում է կինը:

Անձևաջուրը ոչ միայն կարտոֆիլի հորն է վերածել ջրհորի, այլև լցվել է տնամերձ այգին ու ծածկել այն` վնասելով արդեն հասունացող բերքն ու բարիքը, որով ընտանիքը պետք է յոլա գնար: Աստղիկ մայրիկն ասում է, թե գյուղապետարանին դիմել է, եկել են տեխնիկայով փորձել են ջուրը քաշել- հանել, բայց անձրևները նորից սկսել են ու պատմությունը կրկնվել է:
Գյուղապեստ Աշոտ Աշուղյանն էլ, Fnews.am-ի հետ զրույցում նկատեց. «Էս տարիքի մարդ եմ, դեռ իմ կյանքում ես չեմ տեսել, որ էս գյուղում սենց սելավ լինի: Խոտհունձը 10 օր առաջ պետք է սկսած լինեինք, բայց անձևրների պատճառով դեռ ոչ մեկը ձեռքը չի վերցրել գերանդին, սելավի հետևանքով խոտահարք էլ չի մնացել»,-ասում է գյուղապետը:
Նա պատմում է, որ սելավներից մեկի ժամանակ էլ հորդառատ անձրևաջուրը քանդել է բնակիչներից մեկի գոմի պատը, 5 հավ ու 2 խոճկոր է իր հետ քշել տարել:

Գյուղի բնակիչներից Վազգեն Հարությունյանն էլ արդեն հաշվել է իր կրած վնասի չափը:
«Մեր լեզվով ասած` անձրևների խաթեր կարտոշկեն տոթը տվել ա, դե հիմի էլ ամեն ինչը, վարունգ ա, լոբի ա սաղ տարել ա… լոբին սարիների մինչև կեսը հասել էր, սաղ ջարդել ա… գարոխ էլ էինք ցանել, ինչ ունեինք, մեր գյուղը ինչ ցանել ենք, ոչ մի բան չկա լրիվ ջարդել ա»,-ասում է Վազգեն Հարությունյանն ու ձեռքն անհույս թափ տալիս,- «որը վարկով, որը պարտքով փող էր վերցրել ցանքս արել, սաղ ջուրը տարավ…էհ…»,-նորից թափ է տալիս ձեռքը:

Աշոտ Աշուղյանի խոսքով էլ` փողոցներից մեկի տակով անցնող սելավատարները, որը 1500 մմ-ոց խողովակաշարով ապահովում է ջրահեռացումը, շուրջ 15 օր խցանված են մնացել: Գյուղացիներն իրենց ջանքերով փորձում են տեղատարափ անձրևի հետևանքներն ինչ որ չափով մեղմել` ճանապարհները քիչ թե շատ մաքրելով, խցանումները վերացնելով ու սելավատարներն անընդհատ կարգի բերելով:
Գյուղում սպասում են, որ անձրևները դադարեն ու սկսեն հաշվել վնասի չափը: Իսկ թե ինչպես կփոխհատուցի կառավարությունն գյուղացիներին, երբ վնասի չափը վերջնականապես ճշտվի ու ներկայացվի երկի ղեկավարությանը` դեռ վաղ է կանխատեսել: Առայժմ միայն եղանակի տեսությունն է կանխպատեսվում, որը դեռևս այնքան էլ խոստումնալից չէ: