Հովիկ Աբրահամյանին ու Գագիկ Ծառուկյանին կձերբակալե՞ն

Այսօր մամուլում տեղեկություններ եղան, թե սպասվում են ձերբակալություններ գործարար համայնքում, հարկերը թաքցնելու հիմքով: Ընդ որում, խոսքը թե խոշորների, թե միջին բիզնեսի մասին է: Մինչ այդ, ստուգումներ ու տուգանքներ էին սահմանվել ՀՀԿ անդամ մի քանի պատգամավոր-խոշոր գործարարների նկատմամբ:
ԱԺ պատգամավոր Էդմոն Մարուքյանը խորհրդարանի երեկվա նիստում, որտեղ քննարկվում էր գազի խնդիրը՝ գնագոյացում, կորուստներ, թե ինչու է մի բուռ երկրում սահմանին 189 դոլարանոց գազը վաճառվում 360 դոլարով, ասել էր, որ գազի ոլորտում հանձնաժողովի բացահայտումները մի մեծ քրեական գործի նյութ է, որի վրա պետք է մի ամբողջ քննչական խումբ աշխատի, պետք է պատժել թալանչիներին ու թալանը հետ բերել: Նա նշել էր, որ իրականությանը չեն համապատասխանում այն տեղեկությունները, թե գազի կորուստ կա: «Գազը ո՞նց կարա կորի, էդ գազը չի կորում, գնում է որոշ գազալցակայաններ, դառնում է քյաշ փող ու գնում ոմանց գրպանները»:
Թե ինչ լցակայաններ են դրանք՝ գիտեն բոլորը: Ավտոգազի ոլորտում մենաշնորհային դիրք ունի Գագիկ Ծառուկյանը, բավական լայն ներկայացվածություն ունի նրա վարչապետ խնամին՝ Հովիկ Աբրահամյանը: Պատգամավոր Մարուքյանի ասածից հետեւում է, որ այս ոլորտում գազը «դուրս է գրվում» որպես կորուստ, վաճառվում ու գերշահույթներ բերում: Այսինքն՝ «օդից փող»: Կարելի է ենթադրել, որ այս դեպքում հարկերն ամբողջ ծավալով չեն վճարվում, քանի որ այդ դեպքում կբացահայտվի ողջ սխեման:
Ահա այստեղ է գազի գնի գաղտնքիներից մեկը, թե ինչու է աշխարհում գազի համար ամենաթանկը վճարում Հայաստանի քաղաքացին: Փաստացի, այս գազի մի մասը ձեւակերպվում է «կորուստ» եւ գնում բարձրաստիճան պաշտոնյաների բիզնեսներ՝ գազալցակայաններ, ջերմոցներ եւ այլն: «Կորուստ» է ձեւակերպվում նաեւ նրանց կենցաղային սպառումը տներում, ամառանոցներում եւ այլն:
Էներգետիկայի եւ մասնավորապես գազի ոլորտը Հայաստանում ամենակոռումպացվածներից մեկն է, այն իշխող համակարգի «կերակրատաշտն» է, որտեղ սահմանված են քվոտաներ: Այսինքն, քվոտա ունեցողներն իրենց բիզնեսներ տանող «լեւի գիծ» ունեն: Դա երեւում էր այն բանից հետո, երբ որեւէ մեկը «շնորհազրկվում» էր: Օրինակ, այդպես նստեց փառապանծ Ճոյտը:
Բնական է, որ այդ «կորուստները» դուրս են գրվում քաղաքացիների հաշվին, այսինքն՝ քաղաքացիները վճարում են նաեւ դրանց համար: Այսինքն, վճարում են իշխող համակարգի գերշահույթներն ու բարեկեցությունն ապահովելու համար:
Արդյոք իրավապահներն ընթացք կտան պատգամավորի հայտարարությանը, որը ոչ այլ ինչ է, քան հաղորդում հանցագործության մասին: Դժվար թե, քանի որ այդ ամենը ներքին պայմանավորվածությունների արդյունք է: Ընթացք կտան այն դեպքում, եթե որեւէ մեկը Ճոյտի պես «սայթաքի»: Իսկ քաղաքացին կշարունակի վճարել համակարգի անձնական կարիքների համար:

 Աղբյուրը ` Lragir.am