Հրապարակ գնալու փոխարեն` ձեր երեխաներին գոնե մեկ անգամ բերեք Եռաբլուր. զոհված կապիտանի դստեր կոչը

«Հրապարակ գնալու փոխարեն` ձեր երեխաներին գոնե մեկ անգամ բերեք Եռաբլուր, տղերքի հետ ծանոթացրեք, հայրենասիրություն սերմանեք, վրեժով լցրեք, տղերքի կիսատը լրացնել սովորեցրեք, դավաճանին դատապարտել սովորեցրեք: Եռաբլուրում 24 ժամ մայրերի քնքուշ ձայն է: Եռաբլուրում միշտ էլ հայրերի հպարտ հայացքն է արցունքի ետեւում, իսկ տղաները իրենց խոսքը դրոշի միջոցով են փոխանցում… Գիտե՞ք, երբ երեխան իր ծննդյան օրը տորթի մոմն է փչում եւ երազանք պահում կամ երբ եկեղեցի է գնում, Աստված պապիկից առաջինը խաղաղություն է խնդրում: Համերգ եք կազմակերպում՝ իմանալով, որ կան երեխաներ, որ այդպես էլ չտեսան իրենց հայրիկներին, եղբայներին… Կարգախոսը դրել եք «Պարգեւենք ժպիտ բալիկներին», ախր արդեն 8 ամիս է խլել եք բալիկների ժպիտները: Նրանք ժպտում էին, երբ հայրիկը կոնֆետներով տուն էր գալիս աշխատանքից, իսկ այսօր նրանք են կոնֆետներով գնում իրենց հայրիկների մոտ», - գրել է արցախյան 44 օրյա պատերազմում զոհված Իշխան Պետրոսյանի դուստրը՝ ՄԱՐԳԱՐԻՏԱ ՊԵՏՐՈՍՅԱՆԸ եւ, որպես հետգրություն, հավելել. «Սթափվիր, քանի դեռ ամուսինդ ու որդիտ կողքիդ են…»: