Հունահռոմեական ըմբշամարտի Հայաստանի հավաքականը նախաօլիմպիական երկրորդ հավաքը կանցկացնի Ղրիմում

Հունահռոմեական ըմբշամարտի Հայաստանի հավաքականը օրերս կմեկնի Ղրիմ, որտեղ հունիսի 14-28-ը Ռիո-2016-ի օլիմպիական խաղերի նախապատրաստական երկրորդ ուսումնամարզական հավաքը կանցկացնի։ Հունահռոմեական ոճի ըմբշամարտի հավաքականը օլիմպիական չեմպիոն Լևոն Ջուլֆալակյանի գլխավորությամբ տարվա կարևոր ստուգատեսին սկսել է պատրաստվել մայիսի 11-25-ը Ծաղկաձորում կայացած ուսումնամարզական հավաքով, որին հետևեց նաև Իտալիայի Սասարի քաղաքում տեղի ունեցած միջազգային մրցաշարում մեր տղաների հաջողված մրցելույթները։

Լևոն Ջուլֆալակյանը տեղեկացրեց, որ մինչև օլիմպիական խաղեր տղաները մրցաշարերի այլևս չեն մասնակցի, փոխարենը Ղրիմից բացի կմասնակցեն ևս երկու շատ կարևոր ուսումնամարզական հավաքների։

«Օլիմպիական խաղերի նախապատրաստական շրջանն սկսել ենք մայիսի 11-ից։ Եթե ծաղկաձորյան հավաքը նվիրված էր հատուկ, ֆիզիկական և ֆունկցիոնալ պատրաստությանը, ապա Ղրիմում հիմնականում վերականգնողական հավաք ենք անցկացնելու։ Շատ կարևոր հավաք է սպասվում հուլիսի 5-20-ը Բելառուսի Ստայկի մարզաբազայում, որտեղ կարևորվելու է գորգային աշխատանքը։ Նախնական պայմանավորվածության համաձայն՝ մեզ հետ Ստայկիում համատեղ հավաք կանցկացնեն բելառուսները, վրացիները, ֆինները, լիտվացիները, հնարավոր է նաև բուլղարացիները։ Իսկ վերջին՝ նախամրցումային հավաքն անցկացնելու ենք Երևանում, հուլիսի 28-ից օգոստոսի 13-ը, որից հետո երեք փուլով մեկնելու ենք Բրազիլիա»,-ասել է հավաքականի գլխավոր մարզիչը։

Լևոն Ջուլֆալակյանը նաև մանրակրկիտ բացատրեց, թե ինչու են մեր մարզիկները երեք տարբեր օրեր մեկնելու մրցավայր։ «Փորձը ցույց է տվել, որ մինչև օրգանիզմի հարմարումը տվյալ բնակավայրի կլիմային, Հայաստանի հունահռոմեկան ոճի ըմբիշները միշտ էլ ավելի հաջող են հադես եկել, քան հարմարվելուց հետո»,-եզրափակեց 1988 թվականի Սեուլի օլիմպիական խաղերի չեմպիոնը։