Ի վեջո կթանկանա հոսանքը, թե ոչ

Էլեկտրաէներգիայի սակագնի թանկացման դեմ հանրային քննարկումը բավականին բուռն սկսվեց, չնայած մասնակիցների սակավությանը:

Քննարկումն սկսվեց հարցով՝ եթե այսօր ՀՀ քաղաքացին կարողանում է «մի քոռ կոպեկ ճարել», վաղը որտեղի՞ց է ճարելու: Հընթացս որոշվեց, որ միակ ճիշտ ճանապարհը փողոցային պայքարն է:

Առաջարկվեց, որ այսօր Ազատության հրապարակում կանգնած յուրաքանչյուր ոք հենց վաղվանից մարդկանց առաջարկի, որ միանան շարժմանը: Սա պետք է արվի քայլերթով՝ փողոցներով ու բակերով, ու մարդկանց իրազեկվի, որ վաղը այս ուղտը չոքելու է իրենց դռանը:

Առաջարկվեց ծանուցման-իրազեկման թերթիկներ փակցնել՝ որտեղ հնարավոր է՝ շքամուտքերում, բակերում, վերելակներում, կանգառներում

Որոշվեց, որ քայլերթը պետք է արվի առանց երթևեկության որևէ կանոնի խախտման, ինչն ընդունվեց ծափերով:

Միանգամից գործի անցնելու համար  կազմակերպվեց քայլերթ՝ Հյուսիասային պողոտայով,  որի հանգրվանից մեկը  Կառավարության վարչական շենքն է, որի դիմաց բողոքի ցույց են անում նաիրիտցիները:

Խումբը  «ո′չ թալանին» ու «մի-ա-ցում»  կոչերով  շարժեց առաջ:

Կառավարության շենքի մոտ չվախենալու կոչը արվեց նաիրիտցիներին՝ «Դուք էսքանդ չեք, միացե′ք մեզ, մի′ վախեցեք»,-ասացին ակտիվիստները:

Tert.am