Իմ գլխին ոչ ոք, ոչինչ չի կարող կոտրել, ես պինդ եմ.Մովսես Հակոբյան

«Փաշինյանը բանակի համար բան տվո՞ղ է։ Նա երկրի ղեկավար է, նրա գործը երկիր ղեկավարելն է, ո՞վ է ասել, թե նա բանակի համար ինչ – որ բաներ առնելու իրավունք ունի»,- «Փաստինֆո» լրատվականի հետ զրույցում ասել է գեներալ – գնդապետ Մովսես Հակոբյանը՝ հակադարձելով վարչապետ աշխատող անձի այսօրվա հայտարարություններին։

Հիշեցնենք, 44-օրյա պատերազմի հանգամանքներն ուսումնասիրող քննիչ հանձնաժողովի նիստին մասնակցող Նիկոլ Փաշինյանն այսօր հերթական անգամ իրարամերժ հայտարարություններով է հանդես եկել։ Մասնավորապես նա ասել է.«Ես՝ որպես քաղաքական իշխանություն, բանակի առջև դրել եմ պարզ խնդիր՝ ասեք, ի՞նչ է պետք, և դուք դա կունենաք: Ասել են՝ Սու-30 է պետք, դուք պատկերացնո՞ւմ եք։ Գերժամանակից ինքնաթիռ։ Ասել եմ՝ եթե պետք է՝ կունենաք։ Է՞լ ինչ է պետք՝ կոչո՞ւմ է պետք՝ կունենաք, մեդա՞լ է պետք՝ կունենաք, փո՞ղ է պետք՝ կունենաք, սնո՞ւնդ է պետք՝ կունենաք»։

Անդրադառնալով փաշինյանական իշխանության՝ ՍՈՒ գնելու որոշմանը, որոնք այդպես էլ հնարավոր չեղավ օգտագործել՝ Մովսես Հակոբյանն ասում է. «Ես չգիտեմ՝ ո՞վ էր խորհուրդ տվել գնել այդ ՍՈւ- 30-երն, այն էլ՝ առանց հրթիռների։ Ինձանից գնում էր ահազանգել այն մասին, որ, տվյալ իրավիճակում, մեր բանակը դրանց կարիքը չունի, և ես արել եմ»։

Հիշեցնենք, որ ՍՈւ- 30 ինքնաթիռների ձեռքբերման վերաբերյալ Մովսես Հակոբյանի՝ ընդարձակ ասուլիսի հետո, որտեղ գեներալ – գնդապետն ահազանգել էր դրանց ոչ պիտանելիության մասին, քրեական գործ է հարուցվել ու նրան մեղադրանք առաջադրվել ոչ թե կեղծ տեղեկություններ տարածելու, այլ պետական գաղտնիք հրապարակելու համար։ Այսինքն՝ հաստատվել է, որ նրա հայտարարությունները համապատասխանում են իրականությանը, սակայն չպետք է այդ մասին ներկայացներ հանրությանը։

Անդրադառնալով հարցին, թե այսօր Փաշինյանի կողմից իր՝ Մովսես Հակոբյանի հասցեին մեղադրանքներ են հնչել առ այն, իբր վերջինիս տեղեկություններ է շրջանառում, թե վարչապետն է հրաման տվել պատերազմից առաջ դադարեցնել զորահավաքը, Մովսես Հակոբյանը պատասխանում է՝ ինչքան Փաշինյանն իր հասցեին մեղադրանքներ հնչեցնի, այնքան ինքն իրեն լավ է զգալու.«Մի անհանգստացեք, իմ գլխին ոչ ոք ոչինչ կոտրել չի կարող, ես պինդ եմ, իմ վրա են կոտրվում»,- ամփոփելով զրույցն, ասել է գեներալ – գնդապետը։