«Իմ կինն ինձ ի՞նչ վատություն ա արել, որ ես էլ նման բան անեմ». Մնացական Մնացականյան

Ապրիլի 17-ին Արագածոտնի մարզի Թալին քաղաքում սպասվում են Ավագանու եւ քաղաքապետի ընտրություններ: 

Որոշ տեղեկությունների համաձայն՝ Թալինի քաղաքապետի պաշտոնում սեփական թեկնածուի հարցի շուրջ դեռեւս հստակ որոշում չունի  ՀՀԿ-ական պատգամավոր Մնացական Մնացականյանը, ով  Թալինում քաղաքապետ է աշխատել շուրջ 10 տարի: Չնայած նրան, որ պատգամավոր Մնացական Մնացականյանը մինչ այս պահը չի անկեղծանում,  թե ում կցանկանար  տեսնել Թալինի քաղաքապետի աթոռին, բայց եւ շարունակում է հերքել տարածված այն տեղեկությունները, որ ինքը լուրջ ցանկություն է ունեցել իր  կնոջը դարձնել  Թալինի քաղաքապետ:

«Իմ կինն ինձ ի՞նչ վատություն ա արել էսքան ժամանակ, որ ես էլ նրան որոշեի քաղաքապետ դարձնել: Նա  իրա գործն ունի, աշխատում է: Քաղաքապետը նախ լուրջ դժվարություններ ենթադրող պաշտոն է, լուրջ ծանրաբեռնվածություն, ինքն էլ իրա գործն ունի, աշխատում է: Չգիտեմ որտեղից են էդ խոսակցությունները»,-Fnews.am-ի հետ զրույցում ասաց Մնացականյանը: 

Թե ո՞ւմ է սատարելու  քաղաքապետի ընտրություններում՝ տարածքի պատգամավորը, այդպես էլ չհստակեցրեց, միայն հավելեց, որ.«Ես հանրապետական եմ, ում Հանրապետականը ներկայացնի, ես էլ նրան պիտի պաշտպանեմ»: 

Հարցին, թե ինչպե՞ս է վերաբերում այն խոսակցություններին, որ շատ վաղուց իր դիրքերը թուլացել են հարազատ կուսակցության ներսում, Մնացականյանը  արձագանքեց. «Էդ ով ասեց, որ տենց բան կա: Ա՜յ քեզ  բան, մնում-մնում մի բան խոսում են: Ես շատ լավ եմ, իրանք՝ թող լավ լինեն: Ինձ ինչ ա եղել, ո՞ր»-իրենից գոհ պատասխանեց պատգամավոր Մնացականյանը: