Իմ մոտ երդում ու նշանաբան է. «ինչ-որ կուտակել եմ տղայիս համար` անում եմ բանակին…»

Ամեն մի զինվորի վերադարձն ինձ համար ավելի կարևոր է, քան...

ՀՀ կառավարության կողմից օրենսդրական նախաձեռնության կարգով ԱԺ քննարկմանն է ներկայացվել «Հասարակական կազմակերպությունների մասին» ՀՀ օրենքի նախագիծը: Անդրադառնալով նախագծին, «Զինվոր» հասարակական կազմակերպության համակարգող խորհրդի նախագահ Մարգարիտա Խաչատրյանը կարևորում է հատկապես այն կետը, որը ՀԿ-ներին հնարավորություն է ընձեռվում ստանալ պետական աջակցություն և զբաղվել ձեռնարկատիրական գործունեությամբ: Ըստ Մարգարիտա Խաչատրյանի (Մառոզ)` որոշումը տեղին է. քանի որ ՀԿ-ները պետության ֆինանսավորման կարիք ունեն:

Fnews.am-ի հետ զրույցում նա նշեց, որ այս փոփոխությունից ակնկալիքներ ունի, բայց այնքան էլ վստահ չէ, որ նախագիծը հավանության կարժանանա և կյանքի կկոչվի: «Ես մեծ մասամբ բանակի հետ եմ առնչվում, իսկ բանակի ծրագրերի համար գրանտներ չեմ ստանում: Իմ մոտ երդում է, ու նշանաբան. ինչ-որ կուտակել եմ տղայիս համար` անում եմ բանակին…»,-նկատեց Մարգարիտա Խաչատրյանը: Նա համամիտ է այն դիտարկմանը, որ այս հնարավորությունից կարող են օգտվել նաև միայն անունով գրանցված «վայ» կազմակերպություններ: Մարգարիտա Խաչատրյանը նախագծի հնարավոր իրականացման դեպքում հորդորում է պատկան մարմիններին գործել ավելի աչալուրջ: «Եթե մի քանի հոգիանոց ՀԿ-ներ կան, որոնք ծրագրեր չեն իրականցնում և պարզապես ՀԿ-ով գրանցված կառույցներ են, դա չի նշանակում, որ դրանց պետության կողմից ֆինանասվում պետք է լինի:

Հարկավոր է ուսումնասիրել տվյալ կազմակերպության գործունեությունն ու իրականացրած ծրագրերը և դրանից հետո միայն ֆինանասավորել»,-ընդգծեց Մարգարիտա Խաչատրյանը: Նա մեծ ակնկալիքներ ունի նաև կառավարությունում կատարված փոփոխություններից, թեև այս դեպքում էլ դարձյալ վաղ է համարում գնահատականներ տալ ու ասել, թե դա արդեն իսկ դրական տեղաշարժ է:

Մասնավորապես անդրադառնալով Պաշտպանության նորանշանակ նախարար Վիգեն Սարգսյանին` «Զինվոր» ՀԿ նախագահը նկատում է, որ նա աշխատանքային փորձ ունի և նոր մարդ չէ համակարգում: Մյուս կողմից էլ ընդգծում է, որ «Զինվոր» ՀԿ-ն արդեն իսկ բավականին առաջընթացներ է գրանցել: «Ակնկալիքներս մեծ են… տա Աստված` զոհեր չլինեն, տա Աստված` նախարարությունն ավելի շատ աշխատի բարոյահոգեբանական վիճակի բարելավման ուղղությամբ… ամեն մի զինվորի վերադարձն ինձ համար ավելի կարևոր է, քան ցանկացած նախարարի պորտֆել»,-ընդգծեց Մարգարիտա Խաչատրյանը:

Ա. Սահակյան