Իմ օրոք ֆուտբոլի ֆեդերացիայի բյուջեն 10 անգամ ավելացվել է. Ռուբեն Հայրապետյան

Հայաստանի ֆուտբոլի ֆեդերացիայի 13-րդ ժողովի մեկնարկում ուղերձով հանդես եկավ ՀՖՖ-ի նախագահ Ռուբեն Հայրապետյանը.
 

«Ողջունում եմ բոլոր ներկաներին:
 

Իմ նախագահության 12-13 տարիների ընթացքում ֆուտբոլի ֆեդերացիայի բյուջեն 10 անգամ ավելացվել է` հասնելով մոտ 4 միլիարդ դրամի: Այդ ամենը եղել է ֆեդերացիայի անդամների համակարգված աշխատանքի շնորհիվ:
 

Իմ առաջնային նպատակը եղել է ենթակառուցվածքների ավելացումը:Այս ընթացքում վերակառուցվել է «Բանանցի» մարզաբազան, իսկ բոլորովին վերջերս շահագործման հանձնվեց Գյումրիի ֆուտբոլի ակադեմիան:
 

Մենք ակադեմիան հանձնել ենք «Շիրակ» ֆուտբոլային ակումբին, որը հարուստ ավանդույթներ ունի: Վստահ եմ` մոտ ժամանակում Գյումրիից շատ տաղանդավոր ֆուտբոլիստներ են դուրս գալու և համալրելու տարբեր տարիքային հավաքականներ:
 

Կարևորագույն խնդիրներից մեկը մանկապատանեկան ֆուտբոլին առնչվող հարցերն են: Ես ասել եմ, որ մարզիչները թերանում են, որոշ դեպքերում էլ չեն ցանկանում լավ աշխատել: Խոսքս բոլոր մարզիչներին չի վերաբերում. կան այնպիսիները, ովքեր պարտաճանաչ կերպով իրենց գործն են անում: Վերջերս ակադեմիայում մարզում էի նայում, երբ 15 րոպեի ընթացքում պատանի ֆուտբոլիստը մոտ 50 սխալ թույլ տվեց, ես հարցրի մարզչին, թե անթերի՞ է արդյոք ֆուտբոլիստը մարզվում, նա ասաց ոչ...
 

Անդրադարձ ազգային հավաքականներին.
 

Ազգային հավաքականը շատ անհաջող է հանդես եկել, և ես ամբողջ մեղքը չեմ բարդի մարզչի վրա: Մենք պետք է այս ամենից լուրջ հետևություններ անենք: Ինչ վերաբերում է երիտասարդական, մինչև 19, 17 տարեկանների հավաքականներին, ապա այդ ընտրանիներն իրենց գործը լավ են անում: Բազմիցս նշել եմ, որ նրանց գործը բարձրակարգ ֆուտբոլիստներ պատրաստելն է: ՖԻՖԱ-ի ծրագրով մենք ունեցանք մինչև 15 և 14 տարեկանների հավաքականներ, որոնց ֆուտբոլիստները բնակվում են Ավանի ֆուտբոլի ակադեմիայում,  որտեղ բացի մարզվելը նաեւ սովորում են. նրանց համար նաև ուսուցիչներ են աշխատում: Կարևորում ենք, որ ֆուտբոլիստը բարձր ինտելեկտով լինի:

Խոսք Բարձրագույն խմբի մասին.

Ցավոք սրտի ունենք 8 ակումբներ, որոնք հազիվ հազ ենք պահում: Մենք հովանավորներին, ներդնողներին խնդրելով, հազմոզելով ենք անում այդ ամենը: Երկրի դժվարին ժամանակում բարոյական չեմ համարում պետությունից ֆինանսավորում խնդրելու տարբերակը: Պատերազմը դեռ ավարտված չէ, և մենք չպետք է մտածենք այդ մասին:

Մենք ուժեղ առաջնություն ունենալու դեպքում կարող ենք ուժեղ հավաքական ունենալ, սակայն չեմ կարծում, թե մոտ ժամանակում դրությունը կբարելավի:

Հավելեմ, որ հոկտեմբեր-նոյեմբեր ամսին շահագործվելու է Վանաձորի ակադեմիան, իսկ հաջորդը կլինի Արմավիրում: Հերթական անգամ նշեմ, որ ակադեմիաներ կառուցելը ֆեդերացիայի գործը չէ, սակայն ամեն ինչ անում ենք իրավիճակը բարելավելու համար:

ArmSport.am