Իմ շրջապատը, երեխաները, հարազատները որեւէ անգամ պատմությունների մեջ չեն ընկել

Վերջին օրերին, մամուլում քննարկվող հիթային թեմաներից մեկը շարունակում է մնալ Երեւանի Բաղրամյան փողոցում գտնվող «Շարլոտ» գիշերային ակումբում տեղի ունեցած ծեծկռտուքը, որին, ըստ մամուլի հրապարակումների մասնակցել է նաեւ Երեւանի Կենտրոնի հարկային տեսչության պետ Կարեն Կարապետյանը: Նույն հրապարակումների համաձայն, Կարեն Կարապետյանը ստացել է մարմնական վնասվածքներ եւ տեղափոխվել «Նաիրի» բժշկական կենտրոն: Ի դեպ, այս ծեծկռտուքի շրջանակներում, տեղեկատվություն էր տարածվել նաեւ այն մասին, որ Կարեն Կարապետյանը Կոտայքի նախկին մարզպետ Կովալենկո Շահգալդյանին քրոջ որդին է, որն էլ իբրեւ եղել է սկանդալի գլխավոր դերակատարներից մեկը:
Ճշտելու համար, թե իրականում Կարեն Կարապետյանը նախկին մարզպետի քրոջ որդին է թե ոչ, եւ թե արդյո՞ք Շահգալդյանների շրջապատը կարող է կապ ունենալ այդ պատմության հետ, Fnews.am-ը մի քանի հարցադրում արեց Կոտայքի նախկին մարզպետ Կովալենկո Շահգալդյանին:
-Պարոն Շահգալդյան, Շարլոտ գիշերային ակումբում տեղի ունեցած ծեծկռտուքի հետ կապված շոշափում են նաեւ Ձեր մերձավորների անունները: Միջադեպին Ձեր հարազատներից որեւէ մեկը ներկա՞ է եղել, թե ոչ:
-Տվյալ թեմայի հետ կապված բազմաթիվ հեռախոսազանգեր եմ ստացել եւ զրույցների ժամանակ բազմիցս են նշել, որ Կարեն Կարապետյանն իմ քրոջ որդին է: Սակայն ես հայտարարել եմ, որ ունեմ երեք քույր եւ նրանցից ընդամենը մեկն ունի որդի, ում անունն էլ Էմիլ Հակոբյան է: Պետք է նշեմ, որ Էմիլը հարկայինում չի աշխատում եւ որեւէ կապ չունի այդ ծեծկռտուքի հետ: Հոդվածում նաեւ նշել էին, որ իմ քրոջ ամուսինն է Հենրիկ Կարապետյանը, սակայն պետք է եւս մեկ անգամ հայտարարեմ, որ նման անուն ազգանունով քրոջ ամուսին էլ չունեմ: Քրոջս ամուսնու անունն է Ռուբիկ Հակոբյան, ով Էմիլ Հակոբյանի հայրն է: Այս պատմությունից կարելի է ենթադրել, որ մարդիկ պարզապես բան ու գործ չունեն պաշտոնյաների բարեկամներին են փնտրում, ինչ-որ սենսացիաներ են ման գալիս: Վերջին հաշվով լրատվությունն իր նպատակին պետք է ծառայի՞, թե՞ ոչ:
Անկեղծ ասած, ես շատ եմ կարեւորում չորրորդ իշխանության անհրաժեշտությունը: Ցանկացած ժողովրդավարական երկրում մեդիադաշտի անհրաժեշտությունը կա եւ դա նպաստում է ժողովրդավարության զարգացմանը: Օրինակ՝ մեր ժողովուրդը լրատվամիջոցներից սպասելիքներ ունի, սակայն նրանք ցանկանում ենք օբեկտիվ լրատվություն ստանալ:
-Ի՞նչ եք կարծում, ինչու են փորձում հենց Ձեր անունը կապել այս պատմության հետ:
-Ինչ-որ մեկը հավանաբար պատվեր է տվել, կամ դա ինչ-որ մեկի ցանկությունն է եղել: Հարցը կարող ենք դիտարկել նաեւ այլ տեսանկյունից. ենթադրենք այդ տղան իմ բարեկամն է, դրանից ի՞նչ, անգամ ծնողները` երեխաների եւ երեխաները` ծնողների համար այսօր դժվարությամբ են պատասխան տալիս: Գիտեք, բոլորս էլ մարդիկ ենք, եւ նման դեպքեր կարող է նաեւ պատահեն: Մարդիկ ապահովագրված չեն. բոլորն էլ կարող են սխալվել, եթե քննություն է գնում տվյալ հարցերի վերաբերյալ, ապա ամեն ինչն էլ ժամանակի ընթացքում պարզվում է:
-Իսկ Ձեր ընտանիքի անդամները երբեւէ հայտնվել ե՞ն նմանատիպ պատմությունների մեջ:
-Մոտ 14 տարի մարզպետ եմ եղել, իմ շրջապատը, երեխաները, հարազատները որեւէ անգամ պատմությունների մեջ չեն ընկել:
-Բայց այդուհանդերձ Դուք մշտապես գտնվում եք լրատվամիջոցների ուշադրության կենտրոնում:
-Լրատվամիջոցներից շնորհակալ եմ այն բանի համար, որ նրանք իմ վարկանիշի վրա լավ աշխատում են, որպեսզի ես միշտ մնամ ուշադրության կենտրոնում:
-Իսկ նման գործելաոճն ինչի՞ն կնպաստի:
-Հետեւությունները թողնում եմ ընթերցողներին, լրատվամիջոցներին եւ լրագրողներին:

Սոսե  Չանդոյան