Իմ սիրտը դեռ ազատ է, եւ ես սպասում եմ իմ արքայադստերը.PHOTO

Վերջին տարիներին Ամերիկայի Միացյալ Նահանգներում բնակվող երգիչ Գոռ Եփրեմյանն այժմ էլ ակտիվ քայլեր է կատարում կինոաշխարհում: 

Սիրված երգիչն իր ուժերն է փորձում Կենտրոն հեռուստաընկերությամբ հեռարձակվող «Վտանգավոր խաղեր» հեռուստասերիալում, ինչը, շատ-շատերի կարծիքով Գոռի մոտ բավականին լավ է ստացվում:

Fnews.am-ը երգիչ-դերասանի հետ զրուցել է նրա գործունեության, ԱՄՆ-ում բնակություն հաստատելու ու նրան հանդիպած դժվարությունների ու նաեւ անձնականի մասին:

-Գոռ, մինչ այս հանրությունը Ձեզ ճանաչում էր միայն որպես երգիչ: Այժմ Ձեզ շատերը գիտեն որպես դերասան՝ ով  հաջողությամբ կերտել է այնքան սիրված Գոռի կերպարը:

-Նախ պիտի ասեմ, որ ես երգով եմ ապրում, եւ առանց դրա չեմ պատկերացնում իմ կյանքը: Երգն իմ էությունն է՝ իմ զգացողությունը: Իհարկե, ինձ ուրախացնում է այն հանգամանքը, որ հանրությունն  ինձ ճանաչում ու ընդունում է որպես երգիչ, բայց ասեմ, որ առաջին անգամը չէ, որ ես հանդես եմ գալիս որպես դերասան: Ես կարծում եմ, որ բեմի մարդը պետք է տիրապետի նաև դերասանական արվեստին:

-Երբվանից է երգը քեզ ուղեկից դարձել:

-Ես մեծացել եմ երգի հետ միասին: Տատիկս երգչուհի է. ու ես էլ մեծացել եմ նրա երգերի ներքո: Դեռևս մանուկ հասակից երաժշտության նկատմամբ առանձնահատուկ սեր եմ ունեցել: Արդեն իսկ տասներկու տարեկանում որոշեցի փորձեր անել. առաջին անգամ երգեցի Շերամի «օլոր- մոլոր» երգը: Ու երեւի ստացվեց…

-Իսկ ինչպե՞ս ծնվեց «Վտանգավոր խաղերում» դերասանի՝ այս դեպքում ռոմանտիկ ու լավատես Գոռի դերում հանդես գալու որոշումը:

-Կար կերպար՝ Գոռի կերպարը, հենց որի համար դերասան էին փնտրում ու պրոդյուսերներն ինձ առաջարկեց կերպարը փորձել: Ի դեպ, հետաքրքիր պատահականությամբ հերոսի անունն էլ Գոռ էր, որին ես սցենարը կարդալուց հետո համաձայնեցի: Հենց այդպես էլ հայտնվել եմ «Վտանգավոր խաղեր» հեռուստասերիալում: Ասեմ նաեւ, որ հեռուստասերիալը դեռևս եթերում էլ չէր, նախապատրաստական փուլում էր, երբ ինձ առաջարկեցին երգել ֆիլմի սաունթրեքը, որն ըստ իս, շատ սիրվեց….

-Գոռ, իսկ ի՞նչն ես համարում կյանքիդ գլխավոր ձեռքբերումը՝ այս պահի դրությամբ:

-Ձեռքբերումներս շատ են, բայց ամենամեծ ձեռքբերումը կարծում եմ դեռ առջևում է:

-Այդուհանդերձ, առաջին պլանում երգն է՞, թե՞ դերասանական ունակությունները հմտացնելնը: 

-Իհարկե, ես մասնագիտությամբ երգիչ եմ, բայց կարծում եմ՝ ուժերդ պետք է փորձես նաեւ այլ տեղ, եւ քո առջև դրված առաջադրանքը պետք է կատարես գերազանց, ու ամենակարեւորը՝ լինես անկեղծ:

-Իսկ թատերական կրթություն հասցրել ե՞ս ստանալ, թե՞…

-Ես սովորել եմ Աբել Աբելյանի «Casting School» դերասանական ստուդիայում: Ընդունվեցի, որպեսզի որոշակի տիրապետեմ դերասանի վարպետությանը, ինչն ինձ օգնեց ավելի անկաշկանդ լինել բեմում, աշխատել տեսախցիկի հետ, զգալ տեսախցիկը, զգալ կերպարը: 

-Մտավախություն չկա՞, որ երգարվեստը կարող է երկրորդ պլան մղվել:

-Նման բան չի լինի. Երգն ինձ հետ ծնվել է, այն իմ հոգում է:

Բայց պիտի ասեմ, որ կինոն միշտ եմ սիրել ու մտադրություն ունեմ  կինոյով լուրջ զբաղվելու:

-Առաջիկայում ի՞նչ նորությունների կարող է սապասել հանդիսատեսը:

-Միանաշնակ կլինեն նոր երգեր, տեսահոլովակներ: Ասեմ նաեւ, որ նկարահանվել եմ գեղարվեստական ֆիլմում՝ գլխավոր հերոսի կերպարում: Ունեմ նոր առաջարկ, որի շուրջ դեռ մտածում եմ:

-Իրական կյանքում որքանո՞վ է Գոռ Եփրեմյանը նման «Վտանգավոր խաղեր» հեռուստասերիալի հատնի՝ ռոմանտիկ ու բարի Գոռ-ի հետ:

-Կարծում եմ, բավականին նմանություններ կան:
Թեեւ էությամբ ռոմանտիկ չեմ. ավելի իրատես եմ, բայց սիրում եմ կանանց ուրախացնել:

-Ինչպիսի՞ն պետք է լինի Գոռ Եփրեմյանի կինը:(Ասում են, Գոռ Եփրեմյանի համար աղջիկները խենթանում են)...

-Ապագա կինս կլինի այնպիսին, ինչպիսին, որ կլինի…դեռ չեմ պատկերացնում: Բայց կուզենամ, որ բացառիկ լինի: Իմ սիրտը դեռ ազատ է, եւ ես  սպասում եմ իմ արքայադստերը:

-Ի դեպ, ինչ կասես խաղընկերուհուդ՝ Մարինե Մինասյանի մասին, ում երկրպագուները նույնպես շատ-շատ են…

-Մարինե Մինասյանը լավ ընկեր է, լավ մարդ, հետևաբար լավ մարդու հետ հեշտ է նկարահանվել: Առհասարակ, պետք է նշեմ, որ մեր ֆիլմի թե' ստեղծագործական, եւ թե՛ դերասանական կազմը բավականին մտերիմ հարաբերությունների մեջ է: Մենք լավ ընկերներ ենք: Առանց վստահելի ընկերոջ անհնար է կյանքում առաջ գնալ:

-Ի՞նչ տարավ , եւ  ի՞նչ տվեց հեռավոր ԱՄՆ-ում գտնվելու փաստը՝ Գոռ Եփրեմյանին:

-Ես ե՛ւ Հայաստանում, ե՛ւ թե ԱՄՆ-ում շարունակում եմ ստեղծագործել:
Աշխատանքային ու ստեղծագործական առումով ոչինչ չի խլել, միայն մայրցամաքի տարբերությունն է ու անսահման կարոտը:

-Ի՞նչ երազանքներ ունես:

-Ես երազանքներ չունեմ, ունեմ նպատակներ:

-Երբեւէ մտածել ե՞ս Հայաստան վերադառնալու մասին:

-Օտարության մեջ ապրող ցանկացած մարդ մտածում է, որ մի օր վերադառնալու է:

-Ի՞նչը կարող է հունից հանել Գոռ Եփրեմյանին:

-Կարելի է ասել, ինձ ոչինչ հունից չի հանում: Առհասարակ ես համբերատար մարդ եմ:

-Ո՞ւր են ձգվում Գեռ Եփրեմյանի արմատները:

-Ես երևի թե այն եզակի մարդկանցից եմ, որ կարող եմ ասել բնիկ Երևանցի եմ:

-Ո՞րն է Քեզ համար իդեալական ընտանիքի օրինակը:

- Իդեալական ընտանիքը այն է, որտեղ սիրում ու հարգում են մեկը մյուսին ու սիրով են տուն վերադառնում:

-Ինչ նախասիրություններ ունես, եւ ինչով ես զբաղվում ազատ ժամանակ:

-Անկեղծ ասած, ազատ ժամանակ գրեթե չեմ ունենում, բայց փորձում եմ սպորտով զբաղվել:

-Ի՞նչ է պետք կյանքում առաջ շարժվելու համար:

-Կյանքում առաջ շարժվելու համար առաջինը` նպատակ, ձգտում ու աշխատասիրություն է պետք:

-Գոռ, իսկ ինչպիսի՞ն կուզենայիր տեսնել Հայաստանի վաղվա օրը:

-Կուզենամ, որ Հայաստանում պայմանները բարելավվեն, մարդիկ մնան իրենց երկրում, չարտագաղթեն: Իսկ իմ երգրպագուներին ուզում եմ ասել շնորհակալություն. Հավատացեք ձեր ջերմ խոսքերը, վերաբերմունքը ցանկացած ստեղծագործող մարդու համար շատ կարևոր է. Այն ուժ է տալիս՝ նորը ստեղծելու:

Զրույցը՝ Աննա Ավագյանի