Ի՞նչ է հայտարարելու Սերժ Սարգսյանը. Ժամանակ

Սերժ Սարգսյանն այցելել է Լեռնային Ղարաբաղի Հանրապետություն, որտեղ մասնակցել է «Միասնություն-2014» մասշտաբային զորավարժությանը: Սա այն զորավարժությունն է, որի ընթացքում նախօրեին ադրբեջանական կողմից խփվել է հայկական ուղղաթիռը, որը մասնակցում էր զորավարժությանը: Զոհվել է ուղղաթիռի անձնակազմը՝ 3 մարդ:

Այս միջադեպը աննախադեպ է հրադադարի հաստատումից ի վեր և ընդհանրապես կարելի է աննախադեպ համարել միջպետական հարթության համար, երբ մի երկրի զորավարժության ընթացքում մեկ այլ՝ թեկուզ հակառակորդ երկիր խոցում է տվյալ զորավարժության մասնակից օդային տեխնիկան: Միջադեպը մեծ արձագանք է գտել աշխարհում, միջազգային կառույցներում և ղարաբաղյան կարգավորման միջնորդների շրջանում: Հայկական կողմը սպառնացել է, որ հետևանքը Ադրբեջանի համար ծանր է լինելու:

Եվ ահա այդ հայտարարությունների ֆոնին Սերժ Սարգսյանի այցը Լեռնային Ղարաբաղ դառնում է առանձնահատուկ և, բնականաբար, երևակվում լիովին այլ լույսի տակ: Փաստորեն, Սերժ Սարգսյանն այցելելով Ղարաբաղ՝ ընդունում է ադրբեջանցիների նետած մարտահրավերը: Իսկ որ տեղի ունեցածը մարտահրավեր էր՝ կասկածից վեր է: Սերժ Սարգսյանն ընդունում է մարտահրավերը, և սա ինքնին է՛լ ավելի է մեծացնում հայկական կողմի հայտարարած պատասխանի համար, այսպես ասած, քաղաքական պատասխանատվությունը:

Այս առումով հետաքրքրական է, թե արդյոք Սերժ Սարգսյանը ղարաբաղյան այցի ընթացքում կանի՞ որևէ հայտարարություն, թե՞ կբավարարվի լոկ այցելությամբ, լոկ ցուցադրական քայլով:

Խնդիրն այն է, որ ուղղաթիռի խոցումից հետո Սերժ Սարգսյանի՝ Ղարաբաղ կատարած այցն ու մասնակցությունը զորավարժությանը ըստ էության հավասարազոր է դառնում Գերագույն գլխավոր հրամանատարի մարտադաշտ կատարած այցի, իսկ դա ինքնին պահանջում է որևէ լուրջ ակցիա կամ քաղաքական հայտարարություն կամ, այսպես ասած, որևէ գործողություն՝ հրամանի տեսքով:

Այս առումով Սերժ Սարգսյանի այցը կարող է իմաստավորվել քաղաքական որևէ առարկայական, կոնկրետ, հստակ հայտարարության պարագայում, որը առնվազն կվերահաստատի Ադրբեջանի համար ծանր հետևանքների մասին հայկական կողմի նախնական հայտարարությունները: Ըստ որում՝ խոսքը կարող է լինել ոչ միայն կոնկրետ ռազմական կորուստներ պատճառելուն՝ որպես ծանր հետևանք կամ հատուցում ադրբեջանցիների համար, այլ նաև քաղաքական որևէ լուրջ քայլի կամ նախաձեռնության մասին, որով Հայաստանը վերջապես կփորձի Ադրբեջանի համար նախահարձակ արկածախնդրությունների հետևանքները դարձնել առավել երկարաժամկետ:

Մանրամասները` թերթի այսօրվա համարում