Ինչ է պարզվել Ազատ գյուղում հրդեհի հետեւանքով զոհված զինվորների դատաբժշկական փորձաքննությամբ

«Պատկան մարմիններից պահանջում ենք արդար քննություն վարել, պատճառահետեւանքային կապերը վեր հանել: Պետք լինի կրկնակի դատաբժշկական փորձաքննության կենթարկենք մեր տղաների մարմինները, բայց մեր էրեխեքի մահվան պատճառը պետք է բացահայտենք: Մենք ուզում ենք իմանալ՝ մեր երեխեքի մահն ինչից է վրա հասել, ում ձեռքով, ում հրամանով, ով է արել: Ոնց կարող են բացատրել, թե այդ ինչքան շմոլ գազ է առաջացել, որ մեր էրեխեքը երեք անգամ շնչելուց հետո անգիտակից այրվածքային շոկի են ենթարկվել: Ողջ մնացած 6 վկաներից ամեն մեկը տարբեր հայտարարություն է անում, տարբեր բաներ են ասում»,- «Իրավունքի» հետ զրույցում անդրադառնալով Ազատ գյուղում հրդեհի հետեւանքով զոհված զինվորների գործի քննությանը, ասաց զոհված 19-ամյա ԴԱՎԻԹ ՍԱՐԳՍՅԱՆԻ հայրիկը` Նորայր Սարգսյանը, ընդգծելով.

-Դատաժիշկն է փաստել, որ երեխաներից մեկի թոքերը 2-3 անգամ են կծկվել, եւ այդ թունավոր մասը անգամ թոքերի հատակ չի հասել: Մենք կյանքում արդեն ամենաթանկը կորցրել ենք, հիմա ուղղակի խնդրում ենք արդար քննություն վարել, մեր երեխեքի մահվան պատճառահետևանքային կապը հասկանանք։ Մենք ողջ առողջ երեխեք ենք տվել, որ մեր անդորրը, մեր հայրենիքը պաշտպանեն։ Այսօր, ցավոք, չեն կարող մեր երեխաներին ողջ հետ տալ մեզ, բայց գոնե թող պատճառն ասեն, իմանանք: Ամեն ինչ անելու ենք, մենք կորցրել ենք ամենաթանկը:  

Հիշեցնենք` հունվարի 19-ին՝ ժամը 01:30-ի սահմաններում, հրդեհ էր բռնկվել Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում: Հրդեհի հետևանքով զոհվել էին 15, վնասվածքներ ստացել` 7 զինծառայող։

ԻԼՈՆԱ ԱԶԱՐՅԱՆ

Iravunk.com