«Ինչ-որ մեկը չի ուզում, որ եթերում երևամ». Սարգիս Գրիգորյան

Հեռուստադաշտում, առավել ևս հեռուստասերիալներում ժամանակին մեծ պահանջարկ ունեցող դերասան Սարգիս Գրիգորյանը տևական ժամանակ է էկրաններին չի երևում: Life.panorama.am-ը կապ հաստատեց նրա հետ՝ իմանալու, թե ինչո՞ւ նրան այլևս էկրաններին չենք տեսնում, արդյոք մերժո՞ւմ է հրավերները, թե՞ նրանք բացակայում են. «Անկեղծորեն կասեմ, որ հրավերներ չեն լինում: Ես գիտեմ, որ պահանջարկ ունեցող դերասան եմ ու հասկանում եմ, որ ինչ-որ մեկը չի ուզում, որ եթերում երևամ: Իհարկե, կասկածում եմ՝ ով կարող է լինել, բայց առանց հիմնավորման մատնանշումներ չեմ անի»:    

 Հետաքրքրվեցինք, թե կա՞ն պատճառներ, որոնք կարող էին նման կոնֆլիկտի կամ չկամության առիթ դառնալ: Արդյոք այն մարդիկ, որոնց խանգարում է նրա ներկայությունը, հեռուստադաշտո՞ւմ են, թե՞... «Հնարավոր է, շատ չնչին պատճառներ լինեն, թեև նման բան չեմ հիշում: Ամեն դեպքում, ինչ պատճառ էլ լինի, չի կարելի նման կերպ վարվել: Իրենք իրենց խղճի, հոգու առաջ խնդիրներ ունեն: Հեռուստադաշտում կարող են լինել մարդիկ, որոնց ձեռք չի տալիս, որ ես հաճախ երևամ: Մարդկային նախանձ է: 100-ից 80-ը առաջին հերթին ինքն իրեն է ատում, հետո՝ քեզ: Մտածում են՝ ինչո՞ւ իրենց մոտ չի ստացվում այն, ինչը քեզ մոտ է ստացվում»:

Դերասանն այսօրվա մասնագիտական պարապության համար չի վհատվում: Պարբերաբար զանգեր է ստանում մարդկանցից, ովքեր հետաքրքրվում են իր բացակայությամբ: Հավատում է, որ ամեն ինչ լավ կլինի: Արդեն որոշակի շարժեր կան…Իսկ մինչ այդ զբաղվում է սեփական ընտանեկան բիզնեսով և ձայնագրվում ռադիոյում. «Հետաքրքրականն այն է, որ ինձ նաև ձայն կարդալու չեն կանչում հեռուստատեսություն: Այն ժամանակ, երբ չէի նկարվում, գովազդներ, թարգմանություններ էի կարդում հեռուստատեսությամբ: Այժմ այդ դաշտն ամբողջովին փակել են իմ առջև: Դա հեռուստատեսությունից եկող «stop» է, բայց թույլ տվեք չասել՝ ում կողմից, քանի որ ապացույցներ չունեմ»,-մեր զրույցը եզրափակեց դերասանը: