Ինչի՞ համար Carrefour-ն եկավ Հայաստան

Հայաստանի տնտեսությունում մարտ ամսին նորություն եղավ: Ֆրանսիական Carrefour սուպերմարկետների ցանցը մուտք գործեց Հայաստան: Տարածաշրջանում Carrefour կա Վրաստանում և Թուրքիայում: Տարիներ առաջ վերոնշյալ երկու երկրներում այս նորությունը շատ բուռն ընդունվեց և այսօր էլ Carrefour-ը շարունակում է պահպանել իր տեղը: Բնական է, որ Հայաստանում Carrefour բացվեց Երևանում, քանի որ Հայաստանի բնակչության 1/3-ը կամ ավելը ապրում է մայրաքաղաքում: Ուշագրավ է, որ Carrefour-ի մուտքն ի սկզբանե հաճելի սպասում էր ձևավորել ՀՀ քաղաքացիների մոտ: Ինչու ենք հիմա անդրադառնում Carrefour-ին, քանի որ բացման ֆոնին տեղին չէր լինի գնահատականներ տալը և վերջիվերջո պետք է լավ ուսումնասիրել ֆրանսիական ընկերության գործունեությունը:

Շրջելով Yerevan Mall-ում տեղակայված Carrefour-ի տարբեր բաժիններում նկատում ենք, որ առաջին անհրաժեշտության իրերն ու մթերքները ֆրանսիական սուպերմարկետում գնվում է տեղական արտադրողներից:

Այսինքն՝ Carrefour-ի ներմուծած կաթնամթերք հնարավոր չէ գտնել: Carrefour-ը հետաքրքիր գործելաոճ է որդեգրել և գնապիտակների վրա նշում է, թե տվյալ ապրանքը իրենք են ներմուծել, թե տեղական է: Օրինակ՝ ալկոհոլային խմիչքի բաժնում նկատում ենք, որ Ամերիկյան Jack Daniel's վիսկին Carrefour-ը չի ներմուծում, այլ գնում է Հայաստան ներմուծած հայկական ինչ-որ մի ընկերությունից: Հայաստանում ալկոհոլային խմիչքների ներկրմամբ հիմնականում զբաղվում են «Պերնո Րիկար Արմենիան», «Անդակոն», «Սարգիս կարոլինան» և մի քանի այլ ընկերություններ: Փաստորեն, Carrefour-ը կարող է ներմուծել բազմաթիվ այլ խմիչքներ որոնք կան Հայաստանում, սակայն հավանաբար, գերադասում է «անշառ աշխատեմ» տարբերակը և Maritinin ու Chinzanon թողած ներմուծում է ցածրորակ վերմուտ: Մեկ այլ օրինակ՝ Հայաստան մրգեր ներմուծող շատ քիչ ընկերություններ կան և Carrefour-ը չի փորձում ինքն էլ ներմուծել, քանի որ հնարավոր է իրեն արգելեն դա անել:

Արդար չի լինի, եթե չասենք, որ Carrefour-ում կան այնպիսի ապրանքներ, որոնք իսկապես նոր են հայկական շուկայում, բայց օրինակ՝ ծովային մթերքները, որոնք բավականին թանկ են 55 հազար դրամ նվազագույն աշխատավարձ ստացող քաղաքացու համար, իսկ միջին և ավելի բարձր աշխատավարձ ունեցող մարդիկ Հայաստանում մեծ թիվ չեն կազմում: Ուստի այս մասով մեծ բան չի արված:

Համենայնդեպս Carrefour-ի մուտքը Հայաստան չլուծեց մի շատ կարևոր հարց՝ չդարձավ մրցակից մայրաքաղաքի սուպերմարկետների համար: