Ինչո՞ւ ձերբակալվեց Սամվել Բաբայանը

ՀՀ Ազգային անվտանգության ծառայութան մամուլի կենտրոնը երեկ հայտնեց, որ մաքսանենգ եղանակով Հայաստանի Հանրապետություն «Իգլա» տեսակի զենիթահրթիռային համալիր տեղափոխելու փաստի առթիվ հարուցված քրեական գործի ձերբակալվել է երեք անձ, այդ թվում՝ ՊԲ նախկին հրամանատար, Արցախի հերոս Սամվել Բաբայանը։

Անդրադառնալով այս թեմային՝ քաղաքագետ Հրանտ Մելիք Շարնազարյանը Fnews.am-ի թղթակցի հետ զրույցում նշեց. «Անկեղծ ասած՝ ես ուզում եմ դեռևս հասկանալ նպատակը, այսինքն այն, որ ինքը ներգրավված է եղել այդ զինատեսակի՝ Հայաստան բերելու գործում, սա ակնհայտ է, բայց շարժառիթները դեռ հասկանալի չեն: Կարող ենք ենթադրություններ անել: Անկեղծ ասած՝ տեղեկատվական դաշտում հնչող գնահատականների մեջ կան նաև տրամաբանական գնահատականներ, այսինքն՝ որ ոմանք փորձում էին ոչ քաղաքական ճանապարհներով իրենց խնդիրները լուծել... Բոլոր դեպքերում ճիշտը սպասելն է, մինչև կբացահայտվի գործն ամբողջությամբ, այդ ժամանակ հստակ գնահատականներ կկարողանանք տալ: Ես տեղյալ եմ այն մասին, որ ՀՀ ԱԱԾ-ն համագործակցում է վրացական կողմի հետ՝ հասկանալու համար, թե ինչպես է այդ զինատեսակը հասել սահման: Մանրամասներ հայտնի չեն, դրա համար հարկավոր է սպասել»:

Հրանտ Մելիք-Շահնազարյանը շեշտեց, որ իրատեսական չի համարում այն վարկածը, ըստ որի՝ Սամվել Բաբայանին իշխանությունները ազատազրկեցին՝ ընտրություններից առաջ նրան չեզոքացնելու համար:

«Ես կարծում եմ՝ այդ վարկածը շատ անտրամաբանական է, քանի որ Սամվել Բաբայանը չուներ քաղաքական այդ ազդեցությունը, որը չեզոքացնելու համար կարելի էր նման գործողությունների գնալ: Երկրորդն էլ՝ Սամվել Բաբայանին ուղղված մեղադրանքը շատ ծանր է, վստահ եմ՝ պատկան մարմինները շատ լուրջ հիմքեր պետք է ունենային Բաբայանին ձերբակալելու համար: Իրապես, նաև Սամվել Բաբայանի անցած ուղին իմանալով՝ չի կարելի բացառել նման մոտեցումները: Կարծում եմ՝ այդ գնահատականները հիմնազուրկ են, ըստ որոնց՝ ցանկացել են Բաբայանին չեզոքացնել քաղաքական նպատակներով: Գուշակություններ չանենք, առայժմ սպասենք իրադարձությունների զարգացմանը», - նշեց քաղաքագետը: