Ինչո՞ւ է եռյակի երթը շրջանցում Մյասնիկյանի արձանը․ Մարտի մեկի զոհի մոր հարցադրումը

1in.am-ը գրում է. Երեկ Ազատության հրապարակում տեղի ունեցավ ոչ իշխանական եռյակի երկրորդ հանրահավաքը, որին հաջորդեց երթ Երևանի կենտրոնական փողոցներով:

Ինչպես արդարացիորեն նկատել է 2008 թվականի մարտի 1-ի ոճրագործության զոհ Տիգրան Խաչատրյանի մայրը՝ Ալլա Հովհաննիսյանը` երթը շրջանցել է Մյասնիկյանի արձանը, որտեղ նախկինում մշտապես ծաղիկներ էին դրվում զոհերի հիշատակին:

Ալլա Հովհաննիսյանը «Ֆեյսբուք» սոցիալական ցանցի իր էջում գրել է․ «Նախկինում երթերն անցնում էին Մյասնիկյանի արձանի մոտով և մեկ րոպե լռությամբ հարգում Մարտի 1-ի անմեղ զոհերի հիշատակը: Հիմա այդպես չէ, իսկ ո՞րն է պատճառը, արդյո՞ք ժողովուրդը մոռացել է իր նահատակներին, թե՞ հարթակում կանգնածներից ոմանք են խուսափում Մարտի 1-ից»:

«Առաջին լրատվական»-ի հետ զրույցում Ալլա Հովհաննիսյանն ասաց, որ թեպետ նախկինի պես ցանկանում է, որ երկրում իշխանափոխություն տեղի ունենա, բայց իրեն բնավ դուր չի գալիս այն հանգամանքը, որ երթի մասնակիցները արդեն երկրորդ անգամն է Մյասնիկյանի արձանը շրջանցում են․ «Ես հույս ունեմ, որ կլինի իշխանափոխություն, բայց այն իշխանափոխությունը, որը ես եմ ուզում, զոհվածների մայրերն են ուզում, որ Մարտի մեկն ամբողջությամբ բացահայտվի, որ պատասխանատուները պատժվեն: Ես իշխանափոխություն ասելով` դա նկատի ունեմ, ու ես Մարտի մեկն այդ ամենից չէի զատի»:

Հարցին` արդյո՞ք իր գրառման մեջ տեղ գտած «ոմանք խուսափում են Մարտի 1-ից» արտահայտությունը վերաբերում է «Բարգավաճ Հայաստան» կուսակցությանը՝ մասնավորապես դրա ղեկավարին, նաև Վարդան Օսկանյանին, Ալլա Հովհաննիսյանը պատասխանեց․ «Երբ գարնանը Ազգային ժողովում Մարտի մեկի հետ կապված հանձնաժողով էին ուզում ստեղծել՝ նույն «Բարգավաճ Հայաստանը» կողմ էր դրան, միայն Հանրապետականն էր դեմ, ես չեմ ուզի հիմա որևէ ձևով խանգարեմ այդ շարժմանը: Ինձ համար շատ մեծ սպասելիք է Սերժ Սարգսյանին իշխանությունից հեռացնելը, ես դրան անհամբեր սպասում եմ, դրա համար չեմ ուզում իրենց ինչ-որ կերպ խանգարած լինեմ, ես դեռ սպասողի դերում կլինեմ»:

Հետաքրքրվեցինք նաև, արդյո՞ք իշխանության եկած Ծառուկյանը կբացահայտի Մարտի մեկը, մեր զրուցակիցը պատասխանեց․ «Նախ ասեմ, որ համամիտ չեմ այն մտքի հետ, որ կոնկրետ «Բարգավաճ Հայաստանի» ներկայացուցիչը պետք է լինի նախագահ: Ես գտնում եմ, որ ազատ ընտրություններ պետք է լինեն, և շատ հնարավոր է , որ այդ դեպքում Լևոն Տեր-Պետրոսյանը կամ Րաֆֆի Հովհաննիսյանը լինի նախագահ:

Ես կարծում եմ, որ դրանից հետո պետք է լինի օբյեկտիվ հետաքննություն Մարտի մեկի հետ կապված: Այդ ժամանակ ես և բոլորը կիմանանք Մարտի մեկի գլխավոր պատասխանատուն ով է: Ես հիմա էլ գիտեմ ով է, բայց այդ ժամանակ հանրությանն ամբողջությամբ հայտնի կդառնա: Ու եթե Մարտի մեկի հետ կապված ազատ ու արդար հետաքննություն անցկացվի ու բացահայտվի, որ ԲՀԿ-ն կապ չունի` դա այլ հարց է: Բայց պետք է արդար հետաքննություն լինի»,- իր խոսքը եզրափակեց Ա․ Հովհաննիսյանը: