Ինչո՞ւ է գեներալ Մանվելը կենտրոնացել Հրաչիկ Աբգարյանի ուղղությամբ

Բա ինքն ա եղել, Մանվել Գրիգորյանն ա եղել, բա կարող ա՞ Սեյրան Սարոյանն ա եղել:

Համացանցում ակտիվորեն շարունակվում է քննարկվել Էջմիածին քաղաքում գեներալ Մանվել Գրիգորյանի կողմից ՀՀ Կառավության աշխատակազմի նախկին կառավարիչ, Էջմիածնի նախկին քաղաքապետ Հրաչիկ Աբգարյանին ծեծելու մասին շրջանառվող տեղեկությունները:
Նոր բան չէ, որ Էջմիածնում վաղուց ավանդույթ է ձևավորված, որ ավտեմեքենայի սխալ կայանելու համար գեներալ Մանվելը անձամբ է հաշվեհարդար տեսնում իր կողմից սահմանված «օրենքներին» դեմ գնացողներին:

Տարածված կարծիքի համաձայն, գեներալը հրամայում է ծակել անհնազանդների մեքենաների անիվները:Այս դեպքում նույնպես, գեներալը չխախտելով ավանդույթը, եւ նկատելով որ նախկին քաղաքապետը սխալ տեղում է կայանել իր ավտոմեքենան, քաշքշել է Հրաչիկ Աբգարյանին: Շրջանառվող լուրերի համաձայն, այս օրերին ասում են Էջմիածնում իրավիճակը բավականին լարված է, քանի որ գեներալ Մանվելի ու Հրաչիկ Աբգարյանի շրջապատում կարծես թե կրքերը չեն հանդարտվում: Պարզելու համար, թե ի՞նչ վիճակ է տիրում երկու կողմում էլ, Fnews.am-ը կապ հաստատեց գեներալ Մանվել Գրիգորյանի օգնական Վարդան Վարդանյանի հետ, ով մեզ հետ զրույցում նախ փորձեց հավաստիացնել, որ Մանվել Գրիգորյանը որևէ մեկին ծեծի չի ենթարկել չի տվել, ու որեւէ մեկին չի քաշքշել.

-Հունվարի իննից մենք Ղարաբաղում ենք, այցելություններ ենք կատարում զորամասեր, մի շարք ընտանիքներ, այնպես որ մենք որևէ ծեծի հետ կապ չունենք:Նման բան չի եղել:

Մենք կապ հաստատեցինք նաև Էջմիածնի նախկին քաղաքապետ Հրաչիկ Աբգարյանի հետ, ով մեզ հետ զրույցում պատասխանեց, որ ծեծ չի եղել, բայց ահա խոսակցություն և քաշքշոց նրանց միջեւ եղել է:Նախկին քաղաքապետը, մեզ հետ զրույցում անկեղծացավ, ասելով.

-Բայց դուք ոնց եք մտածում, ինձ տենց հեշտ է՞ր ծեծելը: Չգիտեմ տեղյակ եք, թե չէ, բայց ես պրոֆեսիոնալ բռնցքամարտիկ եմ, եւ Պրոֆեսիանալ Բռնցքամարտի ինտերնացիոնալ կոմիտեի նախագահն եմ: Ինձ որևէ մեկը չի կարող ծեծի ենթարկել: Ուղղակի խոսակցություն է եղել, անցել գնացել ա: Թեթև խոսկացություն ու քաշքշուկ էր. մեքենաս կանգնեցրել էի ասեցին հանի, ես էլ ասեց ինչի պետք է հանեմ, իմ համար կանգնել էի, հետո թեթև խոսկացություն եղավ, երդվում եմ, որևէ մեկը ինձ չի ծեծել:

-Այդ դեպքում ինչու է գեներալի շրջապատը հերքում այդ միջադեպի մասին խոսակցությունները:

-Չգիտեմ, իրենց հարցրեք: Ախր էդքան լուրջ հարց ա՞, ախր դուք եթե պատմությունը գիտեք, թե ինչ ա կատարվում Էջմիածնում... ախր ինչի մասին ա խոսքը:

-Պարոն Աբգարյան, վստահ ե՞ք, որ այդ օրը գեներալ Մանվել Գրիգորյանն է եղել միջադեպի կիզակետի կենտրոնում:Գեներալի շրջապատը Ձեզ կասկածում է ստախոսության մեջ:

-Այո տեսել եմ, իհարկե տեսել եմ: Ինչ ասեմ. երեւի իրան նման մեկն ա եղել ուրեմն: Ես այդ օրը խոսել եմ մի հոգու հետ, իսկ Մանվել Գրիգորյանի կողքի տղաները շատ շնորհքով մարդիկ են:

-Ո՞ւմ հետ եք խոսել, կոնկրետ:
-Ես արդեն ասացի:

-Մանվել Գրիգորյանի՞:

-Բա ինքն ա եղել, Մանվել Գրիգորյանն ա եղել, բա կարող ա՞ Սեյրան Սարոյանն ա եղել:

-Իսկ ինչպե՞ս եք վերաբերում շրջանառվող այն խոսակցություններին, որ Ձեր եւ գեներալ Մանվելի հարաբերությունները բավականին լարված են այն պատճառով, որ դուք ջերմ հարաբերությունների մեջ եք քրեական հեղինակություն Դոն Պիպոյի՝Արթուր Ասատրյանի հետ: Գեներալ Մանվել-Դոն Պիպո ընդհարումների ու հակադրությունների մասին մամուլը բազմիցս է գրել:

-Քրեական հեղինակություն ես չգիտեմ, ես գիտեմ հայտնի ու հարգված սպորտսմեն Արթուր Ասատրյան, ով իսկապես Էջմիածնում եւ մեր մարզում լուրջ հարգանք ունի: Ինքը հայրենասեր մարդ ա: Ես էլ եմ հայրենասեր. բոլորը գիտեն, որ Արցախյան պատերազմի տարիներին ես էլ իմ լուման եմ ունեցել, բայց էսօր մարդիկ են խոսում, որ...Իմ մոտ նենց թղթեր կան, դակումնետներ, լուսանկարներ կան, որ սկսեմ խոսել,շոկ կլինի...Ես երբեք չեմ շահարկել պատերազմին իմ մասնակցության  հարցը:

-Բայց չասացիք, Արթուրի հետ ընկերներ ե՞ք թե՞...

-Ես չեմ թաքցնում մենք նորմալ լավ ու մարդկային հարաբերություններ ունենք:

-Այսինք գեներալը նաեւ այդ պատճառով է՞ կենտրոնացել Ձեր ուղղությամբ:

-Չգիտեմ, չգիտեմ քուրս, հետո կխոսենք: Ես ինչ իմանամ, թե ում ուզածն ինչ ա: