Ինչո՞ւ են առաջնագծում միայն անապահով ընտանիքների որդիները. պարզաբանում է Սեյրան Օհանյանը

Միջին եւ ապահով խավի ընտանիքների երեխաները սովորում են բարձրագույն ուսումնական հաստատություններում: Այս մասին այսօր՝ ապրիլի 16-ին, լրագրողների հետ զրույցում ասել է ՀՀ Պաշտպանության նախարար Սեյրան Օհանյանը՝ պատասխանելով հարցին, թե ինչու են առաջնագծում հիմնականում անապահով ընտանիքների երեխաներ:

«Դա այնքան էլ չի համապատասխանում իրականությանը: Այստեղ նաեւ կան օբյեկտիվ հանգամանքներ, պետք է հաշվի առնել Հայաստանի սոցիալական վիճակը: Մեր հասարակությունը պետք է վերլուծի եւ հասկանա՝ ովքեր են կարողանում այսօր բարձրագույն կրթություն ստանալ, ովքեր են կարողանում գիտական թեզեր պաշտպանել եւ տարկետում ստանալ զինվորական ծառայությունից, ովքեր են կարողանում ասպիրանտուրա ընդունվել: Կարծում եմ՝ այս իրականության մեջ միջին եւ բարձր խավերի ընտանիքների երեխաներն են, որ ընդունվում են ուսումնական բարձրագույն հաստատություններ, եւ նրանց մեծ մասն էլ լրացնում է սերժանտական կազմը կամ այս կամ այն մասնագիտությունը, որոնք որ առաջնահերթ նշանակություն ունեն զինված ուժերում։ Գումարած դրան կա այսօրվա Հայաստանի իրականություն՝ ինչ վիճակում է գտնվում ժողովուրդը։ Եթե վերլուծություն անեք, կտեսնեք, որ դրանք օբյեկտիվ հանգամանքներ են»,- ասաց Պաշտպանության նախարարը:

Հարցին, թե առաջնագծում հիմնականում անապահով խավի երեխաների լինելու հանգամանքն արդյո՞ք բանակում կոռուպցիայի առկայության հետեւանքը չէ, Սեյրան Օհանյանը պատասխանեց. «Անձնակազմի կառավարման ոլորտում կատարված բարեփոխումները վերջին տարիներին, կարելի է ասել, բավականին մեծ ռեզոնանս է ստացել մեր հասարակության մեջ: Այսօր Զինված ուժերում զորակոչն իրականացվում է համապատասխան փաթեթների շրջանակում»:

Դիտարկմանը, թե քառօրյա պատերազմի դասերը հաշվի առնելով՝ պատրաստվո՞ւմ են այսուհետ ծառայության հավասար պայմաններ ստեղծել ապահով եւ անապահով խավերի համար, Օհանյանը խոստացավ այդ թերությունը վերացնել.

«Առաջնագծում բոլորի որդիներն են: Անձամբ իմ որդին այնտեղ է ծառայում, սպա է, գլխավոր շտաբի պետի որդին այնտեղ է եղել այս օրերին, եւ մի շարք բարձրաստիճան պաշտոնյաների որդիները այնտեղ են եղել: Եթե կան դեռեւս գոյություն ունեցող թերություններ, ուզում եմ դա համեմատել այն համատեքստում, որ չկա որեւիցե մի գործ, որ թերություն չունենա, ես աշխատելու եմ այդ թերությունը վերացնել»,-ասել է պաշտպանության նախարարը:

Մեր պնդմանը, թե ուզում է ասել, որ այսուհետ առաջնագծում կլինեն նաեւ պաշտոնյաների՞ որդիները, Օհանյանն արձագանքեց. «Շատ պաշտոնատար անձանց որդիներ կան, որ ծառայում են: Հիմա ես հո մեկ-մեկ չե՞մ ասելու՝ ովքեր են»:

news.am