Ինչո՞ւ էր Հայկ Դավթյանը ծննդատանը կրակել իր կնոջ վրա ու ինքնասպան եղել...

Առավոտյան Երեւանի Պերինատոլոգիայի, մանկաբարձության եւ գինեկոլոգիայի կենտրոնում արտակարգ դեպք է գրանցվել: Ամուսինը եկել է հիվանդանոց, կրակել ժամեր առաջ կեսարյան հատմամբ ծննդաբերած կնոջը, ապա ինքնասպան եղել: Ծննդատանը կնոջ վրա 3 կրակոց արձակած, ապա մեկ կրակոցով ինքնասպան եղած Հայկ Վարդանյանի մոտ իրավապահները երկու զենք են հայտնաբերել: Ըստ նախնական վարկածի կինը նստած է եղել բազմոցին, երբ ամուսինը կրակել է նրա ուղղությամբ: Կնոջ վիճակը բժիշկները գնահատել են ծանր, սակայն դեպքի պահին երեխան հիվանդասենյակում չի եղել: Կնոջ առողջական վիճակի մասին Առողջապահության փոխնախարար Գագիկ Միրիջանյանը մասնավորապես նշել էր. "Պերինատոլոգիայի, մանկաբարձության եւ գինեկոլոգիայի ինստիտուտում վիրավորված կինը տեղափոխվել է "Արմենիա" բժշկական կենտրոն, կատարվել են բոլոր անհրաժեշտ հետազոտությունները, այդ թվում կոմպյուտերային տոմոգրաֆիա: Կինը գտնվում է ծանր վիճակում, ունի հրազենային վնասվածքներ: Նրա բուժումը կազմակերպելու համար գումարվել է մասնագիտական կոնսիլիում: Աշխատանքները կոորդինացնում է ՀՀ Առողջապահության նախարար Արմեն Մուրադյանը: Ամենայն հավանականությամբ կարիք կլինի նեյրովիրաբույժի միջամտության, որովհետեւ կա գանգուղեղի վնասվածք: Համաձայն ԿՏ–ի, մեկ փամփուշտ գտնվում է թիակի հատվածում":

Իսկ ահա երեկոյան կողմ արդեն, ինչպես Fnews.am-ի  հետ զրույցում ասաց ԱՆ մամլո պատասխանատու Ա. Հայթայանը. "Երեք ժամ տեւած վիրահատության ընթացքում կատարվել է հրազենային գանգուղեղային վնասվածքի առաջնային վիրաբուժական մշակում: Պարզվել է, որ կնոջ մոտ առկա է ծոծրակոսկրի բեկորային ներհրված կոտրվածք, միջաձիգ սինուսի վնասվածք, ուղեղիկի ձախ կիսագնդի ներուղեղային արյունակույտ և կոնտուզյոզ օջախ: Արյունահոսությունը դադարեցվել է, հեմատոման` հեռացվել: Վիրահատությունն ավարտվել է բարեհաջող, մասնագետները կնոջ վիճակը գնահատում են կայուն ծանր: Հետվիրահատական շրջանում պահպանվում է արհեստական շնչառությունը:
Հիվանդն "Արմենիա" հանրապետական բժշկական կենտրոն էր ընդունվել ծանր վիճակում` հրազենային միջանցիկ սեգմենտալ վնասվածքով":

Նշենք, որ 27-ամյա կինը ինչպես մեզ հաջողվեց պարզել Արարատի մարզի Դվին գյուղից է, եւ ընդամենը երկու տարի առաջ էր ամուսնացել Հայկ Վարդանյանի հետ: Դվինի գյուղապետ Ա. Աբրահամյանի խոսքով.
-Ծնողներից երբեւէ չեմ լսել, որ աղջիկը ընտանեկան կյանքում խնդիրներ կամ տարաձայնություններ ունի: Հակառակը, հարազատների փոխանցմամբ զույգը երկար ժամանակ երեխա չի ունեցել ու այս փոքրիկը երկար սպասված պտուղ էր: Ծնողների պատմելով, իրենց դստեր ամուսինը` Հայկը շատ երջանիկ էր հայր դառնալու պահին եւ նրա արարքը բացատրել չեն կարող:

Նոնա  Ադամյան