Ինչո՞ւ Երևանում չկա սիգ ձկան արձանը, որը սովից փրկեց ողջ ազգին. Լևոն Շարաֆյան

90-ականների դժվար օրերը մարդկանց հիշողություններում թողել են և՛ լավը, և՛ վատը: Մութ ու ցուրտ, կարելի է ասել՝ քաղցած տարիներին շատ ընտանիքներ կերակրած ու փրկած Սիգ ձուկն այսօր դելիկատես է դարձել հայերիս համար. այն թանկարժեք ու ոչ բոլորին հասու կերակուր է:

Նման անհանգստություն հայտնեց մարդկանց անտարբերությունից զարմացող, Ամերիկայի Միացյալ Նահանգներում բնակվող դերասան Լևոն Շարաֆյանը. Ձեզ ենք ներկայացնում սիրված դերասանի՝ Life.panorama.am-ին ուղարկած նամակը :

«Եթե Հռոմի կենտրոնում կանգնեցրել են Գայլուհու արձանը, որն իր կաթով մահից է փրկել Ռեմոս և Ռոմուլոս, ապա ինչո՞ւ Երևան քաղաքում չկա ՍԻԳ ձկանը արձան, որը սովից փրկեց մի ամբողջ ազգ այն ցուրտ և մութ տարիներին: Մենք ձուկը և եփում էինք, և տապակում, աղում էինք, նույնիսկ կոտլետ և դոլմա պատրաստում: Ու պատկերացրեք, որ շատ համով էր: Հիմա Սիգ չկա, վերջացել է, նա իրեն զոհեց մի անբողջ ազգ փրկելու համար:

Միթե՞ արժանի չէ, որ իրեն հիշատակեն: Շատերը քմծիծաղով կկարդան իմ խոսքերը, բայց մի փոքր լռենք և հիշենք այն սարսափելի օրերը: Մտածենք դրա մասին»: