Ինչո՞ւ գազի գնի բարձրացումը մենք 2 տարի անց իմացանք. Ռուբիկ Հակոբյան

Araratnews.am-ը գրում է.

Այսօր Ազգային Ժողովում խմբակցությունների ելույթների ժամանակ Ռուբիկ Հակոբյանը ներկայացրեց Տնտեսական հանձնաժողովի աշխատանքը: «Այն մարդիկ, ովքեր 0-ական են համարում մեր աշխատանքը թող նախ ճշտեն, թե ինչու է իշխանությունը 2 տարի ուշացումով հայտարարել գազի թանկացման մասին: Հանձնաժողովի թիվ մեկ հարցը եղել է պարզել, թե ինչու է գազի գնի թանկացման մասին մեր ժողովուրդը երկու տարի անց իմացել: Գազը թանկացել է 2011թ-ի ապրիլին, այնինչ ժողովուրդը տեղեկացվել է 2013թ-ի ապրիլին»:

Հանձնաժողովը չի հասցրել կատարել իր աշխատանքներն ամբողջությամբ մի պատճառով, հայտնեց Ռուբիկ Հակոբյանը: «Մենք մի խնդիր էինք դրել մեր տնտեսագետների առջև՝ որ 2+2=5, ու պահանջում էինք որ դա ապացուցեին: Գազի հարցը հիմա քաղաքականացված է և անգամ Իսլամական Պետություն ահաբեկչական կազմակերպությունը այժմ պայքար է մղում իր դիրքերը ապահովելու համար այս ոլորտում: Ծիծաղելի է անգամ մտածելը, որ հանձնաժողովը՝ Վարդան Այվազյանի գլխավորությամբ, պետք է Իրանի Իսլամական Հանրապետության հետ քննարկեր Իրանի գազը Հայաստան տեղափոխելու մասին»:

Ազգային ժողովին բանի տեղ չի դրել երբ 300 միլիոն պարտք են կուտակել, հայտնեց Ռուբիկ Հակոբյանը: «Մենք որպես օրենսդիր մարմին պետք է հայտարարեինք, թե բանի տեղ դրե՞լ էին մեզ, երբ 300 միլիոն պարտք են կուտակել: Բանի տեղ դրե՞լ են մեզ, երբ 20 տոկոս բաժնետոմսերը վաճառել են: Եվ վերջապես բանի տեղ դրե՞լ են մեզ, երբ 20 տարի ուշ են հայտնել գազի թանկացման մասին: Ազգային Ժողովը այստեղից պետք է ասեր, հարգելի քաղաքական մեծամասնություն, ինչո՞ւ եք երկու տարի ուշ հայտնում, որ գազը թանկացել է»:

Ուսումնասիրությունների արդյունքում հակաօրինական և հակասահմանադրական է եղել ինչպես 300 միլիոն պարտքի կուտակումը, այնպես էլ մեր 20 տոկոս բաժնեմասի վաճառքը, արձանագրեց Ռուբիկ Հակոբյանը: «20 տոկոս բաժնեմասը կարող էր ավելի էժան կամ ավելի թանկ վաճառվեր, սակայն, ոչ թե դրա վրա պետք է ֆիքսվել, այլ այն փաստի վրա, որ օրենքը բացահայտ ձևով խախտվել է»:

Այն հայտարարությունը, թե գազի գինը բարձրացել է բանակցությունների ընթացքում՝ Ռուբիկ Հակոբյանը նմանացրեց աղջիկ ուզելու հետ: «Գնում են աղջիկ են ուզում, ու կողքի սենյակից աղջկա օժիտը հանում են: Հետո ասում են, ձեր աղջկան պետք է անպայման տաք, որովհետև ձեր աղջկա օժիտն արդեն հանել ենք»: