Ինչո՞ւ հենց այս պահին ձերբակալեցին Մանվել Գրիգորյանին, ու Դոն Պիպոյին

Էջմիածին քաղաքում մի քանի օր շարունակ տեղի ունեցած գործընթացները, այս փուլի համար, կարելի է ասել հասան վերջնակետին:
Երեկ, ԱԱԾ-ն ձերբակալեց ԱԺ գեներալ պատգամավոր Մանվել Գրիգորյանին ու Արթուր Ասատրյանին, ով առավել հայտնի է Դոն Պիպո մականունով:
Ըստ ԱԱԾ պաշտոնական հաղորդագրության, երկուսին պատկանող տներում հայտնաբերվել էր անօրինական զենք ու զինամթերք:
Հիշեցնենք, որ երեկ առավոտյան ԱԱԾ-ն հատուկ գործողություններ էր իրականացրել Մանվել Գրիգորյանին պատկանող շենքերում, իսկ գեներալին  իրավապահները «փակել էին» Երկրապահ միության գրասենյակում: Խուզարկություն էր կատարվել նաեւ Դոն Պիպոյի տանը:
Իսկ այս պահի դրությամբ, ԱԱԾ շենքի դիմաց շարունակվում են բողոքի ցույցերը՝ հաջակցություն Մանվել Գրիգորյանի:
Ակցիայի մասնակիցներն անընդունելի են համարում ԵԿՄ վարչության նախագահ, ԱԺ պատգամավոր Մանվել Գրիգորյանի ձերբակալությունը: Նրանք պահանջում են, որ Արցախի հերոսին ազատ արձակեն:

ԱԱԾ-ի դիմաց բողոքի ակցիա իրականացնողները Մանվել Գրիգորյանին առաջադրված մեղադրանքը շինծու են համարում:

Ստեղծված իրավիճակի, եւ երեկ տեղի ունեցած ձերբակալությունների, ու ներկա քաղաքական իրողությունների շուրջ, Fnews.am-ը զրուցեց քաղաքագետ Գագիկ Համբարյանի հետ:

-Պարոն Համբարյան, Ձեր կարծիքով, ինչո՞վ էր պայմանավորված իշխանությունների երեկվա նման կտրուկ եւ արագ որոշումը, եւ իհարկե ԱԱԾ-ի կողմից իրականացված օպերացիան, որի արդյունքում ձերբակալվեցին գեներալ Մանվել Գրիգորյանն, ու Արթուր Ասատրյանը: 

-Նախ ամենառաջինը.ինչու՞ գեներալ Մանվել Գրիգորյանը: Որովհետեւ գեներալ Մանվել Գրիգորյանը՝ ԵԿՄ նախագահն է: Այսինքն, ինքը կարելի է ասել ունի մեծ հնարավորություններ՝ ոտքի հանելու այն անձանց, ովքեր ժամանակին ակտիվորեն մասնակցել են Արցախյան ազատամարտին: Եւ նրանք էլ, չի բացառվում,որ կարող էին մեծ խնդիրներ ստեղծել իշխանությունների համար:

Հենց դա էր պատճառը, որ նոր իշխանությունները՝ Նիկոլ Փաշինյանի գլխավորությամբ , բեսպրեդելի դեմ պայքարը սկսեցին գեներալ Մանվելից:
Որովհետեւ եթե իրենք պայքարը սկսեին մեկ այլ «բեսպրեդելշչիկից», ով հովանավորովում էր նախկին իշխանությունների կողմից, դա կարող էր նախազգուշացում լինել՝ նախկին իշխանությունների կողմից հովանավորվող անձանց: Եւ նրանք կարող էին միավորվել` նոր իշխանությունների դեմ:
Եւ այստեղ խնդիրն այն էր, որ պետք էր հարված հասցնել մի անձի, ով նաեւ հնարավարություն ուներ  կիրառել զենք ՝իշխանությունների դեմ:
Եւ պատահական չէր, որ դա Մանվել Գրիգորյանն էր. չպետք է մոռանալ այն հանգամանքը եւ այն փաստը, որ 1999 թվականի հոկտեմբերի 27-ից հետո, գեներալ Մանվելը խնդիրներ էր ստեղծել իշխանությունների համար:
Իսկ այդ ամենը հայտնի է, որ լուծվեց միայն բանակցությունների միջոցով:
Հիմա, նոր իշխանությունները երեւի թե չէին ցանկանում բանակցություններ վարել գեներալ Մանվելի հետ, ու նրանք փորձեցին ֆորս-մաժորային իրավիճակ ստեղծել:

-Իսկ Ձեր կարծիքով, Էջմիածնում սկսված հանրահավաքները ինքնաբուխ էին, թե՞…

-Կոնկրետ այդ պայքարը՝ հանրահավաքները գեներալ Մանվելի որդու դեմ, որն Էջմիածնում սկսվեց ընդամենը երեք օր առաջ, կարծում եմ պատահական չէր:
Ու նաեւ շատ տարօրինակ էր, որ այդ հանրահավաքների ակտիվ մասնակիցներից էր նաեւ եւս մեկ անձ, ով ըստ մամուլի հրապարակումների՝ քրեական հեղինակություն Դոն Պիպոն ՝Արթուր Ասատրյանն է:
Ես այն կարծիքին չեմ, որ այդ միտինգը միամիտ էր կազմակերպվել Էջմիածնում: Չմոռանանք, որ այդ նույն հանրահավաքին մասնակցում էին նույն Դոն Պիպոն, եւ հանրաճանաչ Ճոյտը՝ Հակոբ Հակոբյանը:
Եւ իշխանությունները շատ լավ հասկացան, որ այդ իրողությունները հասարակության մեջ կարող են զայրույթ առաջացնել:
Քանի որ ստացվում էր. մի կրիմինալին եւ բեսպրեդելին՝ փոխարինում ենք մի այլ կրիմինալով ու բեսպրեդելով:
Հետեւաբար իշխանությունները փորձ արեցին ինքնամաքրվել, եւ գեներալ Մանվելին ձերբակալելու հետ մեկտեղ՝ ձերբակալեցին  նաեւ Արթուր Ասատրյանին:
Իշխանությունները փորձեցին ցույց տալ, որ իրենք Արթուր Ասատրյանի, կամ Ճոյտ մականունով Հակոբ Հակոբյանի հետ կապ չունեն:

-Իսկ ի՞նչ եք կարծում, նույն գեներալ Մանվել Գրիգորյանի, եւ Դոն Պիպոյի նկատմամբ կկիրառվե՞ն կոնկրետ «սանկցիաներ», թե՞ այնուամենայնիվ ականատես կլինենք այլ սցենարների:

-Նախ ամենառաջինը՝ գեներալ Մանվելին երկար ժամանակ չեն կարող անազատության մեջ պահել: Գեներալ Մանվելի վերաբերյալ՝ խորհրդարանը պետք է ընդունի համապատասխան որոշում, եւ նրան զրկի անձեռնմխելությունից, որն այս պահին շատ դժվար է  կազմակերպել: 
Ինչ վերաբերում է Արթուր Ասատրյանին, ապա նրան կարող է մի փոքր երկար պահեն:

-Ինչու՞: 

-Քանի որ նա անձեռնմխելությունից չի օգտվում:

-Բայց Արթուր Ասատրյանի անունն էլ, Հռոմ Պապի հետ է կապվում…Մամուլի էջերով այդ մասին բազմիցս է խոսվել…

-Անկեղծ ասած չեմ հավատում, որ նա Հռոմի Պապի հետ կապ ունի, քանի որ նրա անունը ավելի շատ կապված էր Իտալիայի նախկին վարչապետ Սիլվիո Բերլուսկոնիի հետ: Ես չեմ կարծում, որ Հռոմի Պապերը իրենց թույլ տան աշխարհիկ մարդկանց հետ այդ աստիճան մտերմություն անել: Նրանք, այդ առումով, առավել   զգուշավոր են:

Իսկ ինչ մնում է Սիլվիո Բերլուսկոնիին, ապա նրանց մտերմությունը հավատալու է, քանի որ նա լինելով  մութ քաղաքական գործիչ, կարողանում էր «լեզու է գտնել»
բոլոր խավերի ներկայացուցիչների հետ:

-Այդուհանդերձ իշխանությունները նո՞ր իմացան, որ գեներալի, կամ Դոն Պիպոյի ապարանքից կարող են ապպօրինի զենք -զինամթերք հայտնաբերել: Ձեր կարծիքով, նրանցից բացի, չկա՞ն այլ բդեշխներ, ու մեծահարուստներ, որոնց անունը եւս՝ կրիմինալի ու քրեական հանցագործությունների հետ կարող էր կապվել:

-Դե իհարկե, իշխանությունները այսօր չեն իմացել այդ մասին: Նրանք շատ լավ գիտեն, թե գեներալ Մանվելը որտեղ է զենք պահում:Հայաստանի Հանրապետությունը այնքան փոքր երկիր է, որ բոլորի կյանքը անմիջականորեն վերահսկվում է ԱԱԾ-ի կողմից: Այստեղ  ոչ ոք՝  գաղտնի գործունեություն ծավալել չի կարող:
Իսկ թե ինչու գեներալ Մանվելը, որովհետեւ նա առանձին բանակ ուներ պետության մեջ, որը կոչվում էր Երկրապահ:

-Հիմա ինչ, փորձ է արվելու ԵԿՄ-ն կազմաքանդե՞լ:

-Գիտեք ինչպես, եթե ոչ կազմաքանդել, ապա նախազգուշացնել, որ ավելի զգույշ եւ ավելի զուսպ լինեն:

-Ի դեպ, այդ զգուշավորության համատեքստում կա՞ արտաքին քաղաքական գործոն, մասնավորապես Արցախի հարցի թնջուկ, որի հետ կապված արդեն իսկ որոշակի ռեպլիկներ են հնչել…

-Ես չեմ կարծում, որ գեներալ Մանվելի հետ կապված դեպքերը՝կապված են արտաքին քաղաքական գործոնի հետ:
Խնդիրը՝ ավելի շատ ներքաղաքական է, քանի որ նոր իշխանությունները Նիկոլ Փաշինյանի գլխավորությամբ, չեն մոռանում հոկտեմբերի 27-ին հաջորդող օրերը: Դա բոլորը գիտեն, որ գեներալ Մանվելը լինելով կորպուսի հրամանատար, ուղղակիորեն փորձել էր տանկեր շարժել՝ դեպի Երեւան: Եւ հիմա էլ, ոչ ոք չէր կարող երաշխավորած լիներ, որ նույն գեներալ Մանվելը, չէր կարող զենք բաժանել, եւ խնդիրներ ստեղծել նոր իշխանությունների համար:

Fnews.am 

Լուրեր Հայաստանից