Ինչո՞ւ սպանեցին Գեւորգ Մհերյանին, եւ ի՞նչ հայտարարությամբ հանդես կգա Մհերյանի հայրը

33 տարեկան հասակում սպանված փոխոստիկանապետ Գեւորգ Մհերյանի սպանությունը դեռեւս  չի բացահայտվում: Այս մասին, Fnews.am-ի հետ զրույցում ասաց  Գեւորգ Մհերյանի հայրը` Պետրոս Մհերյանը: «Դեռ չկա այնպիսի նորություն, որը հանրությանը կհետաքրքրի»,-ասաց Մհերյանը;
Պետրոս Մհերյանից հետաքրքրվեցինք նաեւ, իր կարծիքով  Գեւորգ Մհերյանի սպանության բացահայտումը ամիսների՞, տարիների՞, թե՞ օրերի խնդիր է: Հարցին  ի պատասխան նա  արձագանքեց. «Ես դա միանշանակ չեմ կարող ասել: Ես չեմ բացահայտողը, ես չեմ քրեական գործով զբաղվողը, բայց իմ հայեցողությամբ պետք է որ բացահայտվի: Իմ ձեռքի տակ ունեցած փաատերին նայելով շուտով պետք է բացահայտվի»,-ասաց Գևորգի հայրը: Ի դեպ,  Պետրոս  Մհերյանը բազմիցս է ակնարկել,   որ որդու սպանության հետ կապված անուններ կտա, սակայն մինչ օրս որևէ անուն այսպես ասած չկա. «Փետրվարի չորսին հանդես կգամ հայտարարությամբ, գուցե այդ ժամանակ անուններ կասեմ»,-նկատեց Պետրոս Մհերյանը: 

Հիշեցնենք, որ 34-ամյա փոխոստիկանապետ Գեւորգ Մհերյանը սպանվել է 2009 թվականի փետրվարի 3-ին ժամը 20.15-ին, Երեւանի Բարբյուս փողոցի 65 շենքի (Կիեւյան կամրջի հարեւանությամբ գտնվող «Օլիմպիա» մոթելի դիմաց) 7-րդ հարկի միջանցքում` վերելակից դուրս գալուց հետո։ Մհերյանի վրա արձակվել է ութ կրակոց, որոնցից հինգն են նրան դիպել։ Իրավապահները դեպքի վայրում հայտնաբերել են 9 մմ տրամաչափի 8 պարկուճ եւ չորս գնդակ։ Ավելի ուշ պարզվել էր, որ Գեւորգ Մհերյանին մարդասպանը դարանակալել էր զոհի բնակարանի հարկաբաժնի վերելակի մոտ։ Երբ Մհերյանը վերելակից դուրս է եկել, մարդասպանն անմիջապես դիմահար կրակել է նրա կրծքին եւ գլխին։ Մարդասպանի արձակած ութ կրակոցների ձայնը լսելի է եղել Մհերյանի հարկաբաժնում ապրող բնակիչներին։ Սակայն նրա հարեւանները մի քանի րոպե վախեցել են տանից դուրս գալ, ինչի արդյունքում մարդասպանին հաջողվել է հանցագործության վայրից աննկատ հեռանալ: