Ինչու և ովքեր են ուզում ազատվել ԱԱԾ արխիվներից. Կարապետ Պողոսյան

2018թ. տեղի ունեցավ ծանր հանցագործություն պետության նկատմամբ, «խաղաղ անհնազանդության» անվան տակ իրականացվեց իշխանազավթում, որի հետևանքն հանդիսացավ պայմանավորված պատերազմը, տարածքների կորուստը, 1000֊ավոր մարդկանց կյանքից զրկելը (շարքը կարելի է շատ երկար թվարկել):

Բնականաբար ԱԱԾ արխիվներում (ինչքան էլ դա քչերին է հասանելի) կան բոլոր հարցերի պատասխանները, մասնավորապես 2018֊ի իշխանազավթման, դրա շահառուների, պատվիրատուների, ստվերային իրականացնողների...

Բնականաբար բավականաչափ ինֆորմացիա կա, բոլոր այն կարևորագույն որոշումների, գործողությունների, գաղտնի և ոչ գաղտնի հրամանների, հրամանները տվողների և իրականացնողների մասին։

Չորս ու կես տարիներն եղել են շատ բուռն, բազմաթիվ անգամներ փոփոխվել են ուժային կարևոր գերատեսչությունների ղեկավարները, նրանց տեղակալները, հասարակության մեջ բազմաթիվ են հարցերը...

Ապագայում պետականության կայացման գործում շատ կարևոր և առաջնային է լինելու պրոցեսների հստակ գնահատումը, հիմնված փաստարկների և ապացույցների վրա։

Ինչպես նշեցի հասարակության ներսում բազմաթիվ են հարցերը, որոնք հիմնված իրական և հաճախ ոչ իրական ենթադրությունների վրա...

Խորտակվող նավից ինչ որ պահի թռնող «իշխանությունը», բնականաբար պետք է փորձի ապագայում, շատ հարցերի պատասխանները թողնել, և մեղավորության մեծ բաժինը բարդել հենց ԱԱԾ֊ի վրա, հետևաբար հասկանալի է, որ հենց հանցավոր ճանապարհով իշխանություն զավթածները պետք է օգտագործեն իրենց իշխանությունը հանցանքը թաքցնելու և հետագայում պատասխանատվությունից խուսափելու համար...

Իսկ հասարակության մոտ արդեն ձևավորված խորը կասկածները փարատելու և հետագայում ուրիշի փոխարեն չդատապարտվելու համար արխիվների գոյությունը շատ կարևոր է... Այս ուղղությամբ ռեալ պայքար և առաջնային կռիվ պետք է տան ԱԱԾ ներկայիս ղեկավարները, 2018֊ից մինչ այսօր պատասխանատու պաշտոնյաները, հակառակ դեպքում, ավելի ուշ, հենց այս իշխանությունն է իրենց նկատմամբ գործեր կարելու, իսկ ապագայում սերունդները հենց իրենց են անիծելու, քանզի ինչպես նշեցի կան լիքը կասկածներ և արխիվները ոչնչացվելուց հետո էլ ավելի են տրամադրությունները սրվելու։

Կարևոր և գովելի է ԱԱԾ նախկին ղեկավարներ Արթուր Վանեցյանի և Միքայել Համբարձումյանի պարբերաբար հնչեցրած գնահատականները (ինչքան էլ դրանք շատերի համար ընդունելի կամ թերի են համարվել)։

Ցավոք մենք չենք ունենա Գ.Կուտոյանի գնահատականը և այստեղ կարող է լույս սփռել այդ ժամանակվա պատասխանատուներից Արզուման Հարությունյանը, ում խոսքին անհամբեր սպասում ենք արդեն 4,5 տարի...

Հետևաբար պարոնայք գործող և այս պահին պահեստազորը համալրած սպաներ, թույլ չտաք արխիվների վերացում, դուք ինձանից լավ եք պատկերացնում դրա հետևանքը պետականության, ապագայի և ձեր անվտանգության համար, ինձանից էլ 1000 անգամ լավ գիտեք ինչ անել և ինչպես դրանց պահպանումը ապահովել:

Artur Vanetsyan Միքայել Համբարձումյան