Ինջիղուլյանն ավելի խելոք գտնվեց, քան Ադրբեջանի հատուկ ծառայությունը

Tert.am-ը գրում է.
Ինջիղուլյանն ավելի խելոք գտնվեց, քան Ադրբեջանի հատուկ ծառայությունն ու քարոզչությունը։ Այս մասին Tert.am-ի հետ զրույցում ասաց քաղաքագետ Լևոն Մելիք-Շահնազարյանը՝ անդրադառնալով ադրբեջանական գերությունից Հակոբ Ինջիղուլյանի վերադարձին։

«Ես դա համարում եմ զինվորի քաղաքացիական սխրանք, որովհետև ինքը շատ լավ հասկանում էր, որ եթե պահանջեր իրեն վերադարձնեն Հայաստան, ինչի իրավունքն ուներ, ապա ինքն այնտեղ կմեռներ «ինքնասպանությունից», կամ ինչ-որ մի հիվանդությունից»,-ասաց նա։

Ըստ քաղաքագետի՝ Հակոբ Ինջիղուլյանն ընտրեց ամենաճիշտ ճանապարհը։ Նա նշեց, որ նախապես գերին չի իմացել, թե որտեղ է հայտնվելու, սակայն հայտնվելով Ռումինիայում հաջորդ օրը կապ է հաստատել ընտանիքի հետ, ինչի մասին հայտնել են ընտանիքի անդամները։

«Այն, որ ինքը ցանկություն հայտնեց վերադառնալ Հայաստան դա խոսում է մի բանի մասին. այդ երիտասարդը վստահում է իր երկրին, հայրենիքին, օրենքներին և իշխանությանը, որ իրեն չեն պատժի՝ գերության մեջ հայտնվելու համար։ Իսկ մենք գիտենք, որ ադրբեջանցի բոլոր այն զինվորները, ովքեր հայտնվել են գերության մեջ, կամ մոլորվել են, բոլորն առ այսօր ձերբակալված են և ամենաքիչը դատապարտվել են 9-ը տարվա ազատազրկման։ Այսինքն՝ Ադրբեջանի զինվորի մտքով չի անցնի վերադառնալ այնտեղ, որովհետև շատ լավ գիտի, թե դա ինչով է ավարտվելու»,- ասաց Լևոն Մելիք Շահնազարյանը։

Երկրորդ կարևոր հանգամանքը, ըստ քաղաքագետի, դա այն է, որ ի չիք է դարձնում Ալիևի կողմից հաճախ կրկնվող այն թեզը, թե Հայաստանի ժողովուրդը միայն փախնելու մասին է մտածում, Հայաստանը դատարկվում է։ «Ինջիղուլյանն արդեն Եվրոպայում էր, արդեն տեղավորված էր և պետությունը հոգում էր իր մասին, սակայն նա դա թողեց և վերադարձավ»,- ասաց նա։

Քաղաքագետը համոզված է, որ իսկապես Ինջիղուլյանին հաջողվել է խաբել ադրբեջանցիներին, որովհետև Ադրբեջանը չէր կարող պատկերացնել, որ գերին կարող է այնտեղից վերադառնալ Հայաստան։ «Իրենց հաշվարկներում մտածել են այնպես, ինչպես կանեին ադրբեջանցիները։ Համոզված եմ, որ երիտասարդը իր կյանքը փրկելու համար դիմել է այդ քայլին՝ նպատակ ունենալով վերադառնալ հայրենիք։ Իր վերադարձը ես համարում եմ մեծ հաղթանակ՝ Հայաստանի և անձամբ հայ զինվորի»,- ասաց նա։

Քաղաքագետը նաև զգուշացրեց, որ այսուհետ մեր զինվորները պետք է տասնապատիկ ավելի զգույշ լինեն, որովհետև Ադրբեջանն արդեն հասկացել է, որ նման ձևով էլ են հայերը վերադառնում, այսինքն՝ եթե գերի ունենանք, նրա համար ճակատագիրն ավելի ծանր կլինի։

«Ընդդեմ իրավական կամայականությունների» ՀԿ նախագահ, ՀՀ մարդու իրավունքների նախկին պաշտպան Լարիսա Ալավերդյանը գտնում է, որ Ինջիղուլյանի վերադարձը դրական նախադեպ է։

«Մինչ այդ եղել են դեպքեր, երբ անձիք ճնշման կամ այլ հանգամանքների բերումով ցանկացել են հայտնվել երրորդ երկրում և եթե նույնիսկ հայտնվել են, մեզ դա հայտնի չէ։ Սա դրական նախադեպ է, որը խոսում է այն մասին, որ առաջին՝ Ադրբեջանի տարածած տեղեկատվությունը հնարած էր և երկրորդ՝ հայկական կողմի, մասնավորապես՝ պաշտպանության նախարարի հայտարարությունները, ունեցել են դրական արձագանք»,-ասաց Լարիսա Ալավերդյանը։

մանրամասները՝ սկզբնաղբյուրում