Ինքնասպանությո՞ւն, թե՞ խաղ-սպանություն. նոր, ուշագրավ մանրամասներ 10-ամյա Դավիթի ինքնասպանության դեպքով

Մարտի 29-ին Գյումրիում կախված հայտնաբերված 10–ամյա Դավիթ Գալոյանի ցնցել է ողջ Գյումրին: Fnews.am-ի հետ զրույցում անդրադառնալով իր դպրոցի սանին` Գյումրու թիվ 24 դպրոցի տնօրեն Հակոբ Հակոբյանը ասաց.

-Դավիթը…, մեր խելացի աշակերտը, մինչեւ հիմա չենք կարողանում հաշտվել կատարվածի հետ: Լուսավոր, խելացի ու ժիր բալիկ էր: Դպրոցում ոչ ոք չի կարողանում անցյալով խոսել այդ երեխայի մասին: Դասընկերները դեռ ցնցված են, ինչպես բոլոր մնացածները:
Տնօրենի խոսքով.
- Դեռ հստակ չէ՝ դա ինքնասպանություն էր, թե դժբախտ պատահար: Քանի որ ինձ հասած տեղեկությունների համաձայն, դատաբժշկական փորձաքննության արդյունքում Դավիթի մարմնի վրա բռնության հետքեր չեն հայտնաբերվել: Ըստ ինձ հասած լուրերի` եզրակացության մեջ նշվել է խաղ-սպանություն: Ասում են մայրը, ով բուժքույր է աշխատում, մտել է տուն եւ տեսել երեխային բազկաթոռին նստած վիճակում, հետեւից ինչ-որ գոտի կածված: Ըստ երեւույթին երեխան ինչ-որ խաղ է ուզեցել խաղալ:
Մայրն էլ դեռ ուշքի չի գալիս, դեռ ցուցմունք էլ չի տվել: Դասղեկը, ուսուցիչները գնում գալիս են, բայց դեպքի մասին հարցնել դեռ չեն համարձակվում, շատ ահավոր վիճակում է:

Հիշեցնենք` 2019 թվականի մարտի 29-ին`ժամը 17:30-ին, «Գյումրու շտապ բժշկական օգնության կայան» ՓԲԸ-ից ՀՀ ոստիկանության Շիրակի մարզային վարչության Գյումրի քաղաքի Մուշի բաժին ահազանգ է ստացվել այն մասին, որ Գյումրի քաղաքի տնակներից մեկում հանկարծամահ է եղել տղա երեխա՝ ծնված 01.05.2008 թվականին:

Անմիջապես դեպքի վայր է մեկնել օպերատիվ-քննչական խումբը:
Նախնական տվյալներով՝ անչափահասն ինքնասպանություն է գործել՝ իրենց տնակում գոտիով բազկաթոռի հետնամասում տեղադրված աթոռակից կախվելու միջոցով:
Կատարվել են անհրաժեշտ քննչական գործողություններ՝ դեպքի վայրի զննություն, հարցաքննվել են մի շարք անձինք, առգրավվել են դեպքի պահին երեխայի հագին եղած հագուստները:
Նկատի ունենալով, որ նախապատրաստված նյութերում առկա է քրեական գործ հարուցելու բավարար հիմք և առիթ՝ Շիրակի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 110-րդ հոդվածի 1-ին մասով: