Իրենք այդ մասին պետք է շուտ մտածեին, ու ոչ թե վերքի վրա աղ լցնեին

Ինչպես հայտնի երկու երիտասարդների մահվան մեջ մեղադարող դերասան Վարդան Պետրոսյանի մասնակցությամբ ավտովթարի գործով դատավարությունն ավարտված է եւ դեկտեմբերի 17-ից մտնելու է դատական վիճաբանությունների փուլ: Հիշեցնենք, որ հոկտեմբերի 20-ին խոշոր ավտովթար էր տեղի ունեցել Կոտայքի մարզում: Ժամը 21:20-ի սահմաններում Եղվարդ-Երեւան ավտոճանապարհի 32-րդ կմ-ի հատվածում բախվել են BMW մակնիշի եւ Վազ 2121 մակնիշի ավտոմեքենաները: Վթարի հետեւանքով վեց հոգի մարմնական վնասվածքներով տեղափոխվել էին տարբեր հիվանդանոցներ: Վիրավորներից երկուսը' 16-ամյա Էդուարդն ու Էդգարը, մահացել են: Վարդան Պետրոսյանի նկատմամբ մեղադրանք առաջադրվեց ՀՀ Քրեական օրենսգրքի 242-րդ հոդվածի 3-րդ մասի հատկանիշներով:

Շուրջ տաս ամիս ընթացող դատավարության ընթացքում հարցաքննվել են առանցքային վկաները, ցուցմունք է տվել նաեւ ամբաստանյալ Վարդան Պետրոսյանը: Նշենք, որ սկզբնական շրջանում դատավարությանը մասնակցում թէին նաեւ արտերկրից ժամանած փաստաբաններ, ովքեր պատպանում էին դերասանի շահերը, սակայն վերջին ամսվա ըթացքում նրանք այլեւս չէին ներկայանում նիստերին: Եվ, ըստ տարածված լուրերի, վերջիններս հասկացել են, որ դերասանը իսկապես մեղավոր է, դրա համար էլ հրաժարվեցին ներկա գտնվել դատավարության ընթացքին: Ինչեւէ, Fnews.am-ը  փորձեց զրուցել տուժող կողմի` Հակոբյանների փաստաբան ՌՈՒԲԵՆ ԲԱԼՈՅԱՆԻ հետ, եւ պարզել, թե ինչպես է գնահատում դատավարության ընթացքը:
-Պարոն Բալոյան դատավարությունն ավարտված է, ինչպե՞ս կգնահատեք անցած դատավարությունը:
-Շատ վատ եմ գնահատում դատավարության ընթացքը այն առումով, որ ինձ թույլ չտվեցին ապացուցել, որ Վարդան Պետրոսյանը մեքենան ալկոհոլ օգտագործած վիճակում է վարել, թե ոչ: Բայց, ըստ էության` Վարդան Պետրոսյանի մեղքը հիմնավորվեց: Եվ փորձագետը բացատրեց, եւ մենք մեր դիրքորոշումների մեջ բազմիցս հայտնեցինք, որ ոչ ուղեւորների քանակը վթարի հետ կապ ունի, ոչ կողային հայելիների բացակայությունը, ոչ էլ գազի բալոնը: Կրկնակի փորձաքննություն իրականացնելու համար 16000 հազար ստորագրություն հավաքելու նպատակն այդպես էլ չհասկացա: Ի վերջո` այդ քաղաքացիները չեն որոշելու կրկնակի փորձաքննություն նշանակվելու` է, թե ոչ: Դրա համար կա օրենքով սահմանված կարգ, թե դա ինչի համար արվեց, դա էլ մեզ համար մնաց անհասկանալի: Ամեն դեպքում դատաքննությունը օբյեկտիվ է ընթացել, եւ Վարդան Պետրոսյանի մեղքը ապացուցված է, այստեղ որեւէ թեմա այլեւս լինել չի կարող: Դատարանը պարտավոր է քննության առնել և մեղմացնող, եւ ծանրացնող հանգամանքները, քանի որ դատավճիռ կայացնելիս այդ ամենը պետք է հաշվի առնվի:
- Ըստ Ձեզ  հնարավոր է "սիրված դերասան" հանգամանքը դատարանում հաշվի՞ առնվի:
- Դե իհարկե հնարավոր է, որ խմածությունը ապացուցելը թույլ չեն տալիս, դա էլ կարող են հաշվի առնել, ինչ ասեմ: էլ չեմ ասում, որ դերասանի կողմի մարդիկ դատավարության ընթացքում տուժող կողմի ներկայացուցիչներին ծաղրելով, հեգնելով էին հարցեր տալիս, վիրավորում վկաներին, տուժող կողմին, բայց այդ ամենը չգիտես ինչու կրկին անտեսվում էր: Բայց ես այդ բոլորը հատ-հատ գրելու եմ իմ ճառի մեջ, ես դա չեմ շրջանցելու` սկսելու եմ դատավարության վերջին օրվանից մինչեւ վերջի նիստը:
-Դերասանի փաստաբանը մամուլում հաճախ է անդրադառնում, որ դատավարությունը ձեւական բնույթ է կրել, ի՞նչ կասեքայդ առումով:
- Քննիչը մի երկու մանր-մունր սխալներ թույլէ տվել, բայց դա չի նշանակում, որ դա խոսում է այն մասին, որ մեղադրողը պաշտպանել է քննիչին: Թե' զննությամբ, եւ  թե'  լուսանկարներով պարզ երեւում է, որ այդ բախումը   եղել է:
- Իսկ, ի՞նչ կասեք կողմերի հաշտության մասին:
- Հաշտության թեմա չկա, այդ թեման փակված է: Թող դերասանի կողմը իրենց մեջ ման գա, թե ինչի չկայացավ այդ հաշտությունը:

Fnews.am-ը  զրուցեց  նաեւ տուժող կողմի` Արթուր Հակոբյանի հետ, ով  անդրադառնալով կողմերի միջեւ հաշտությանը ասաց."Հաշտեցման մասին խոսք լինել չի կարող, իրենք դրա մասին շուտ պետք է մտածեին, ոչ թե տասներկու ամիս մեր վերքի վրա աղ լցնեին, ու դատավարության վերջում ուզենային հաշտվեին":

Տաթեւիկ  Աբրահամյան